Khà jờng Sră ƀău dà lơgar dơ̆ XVII geh 1 rbô 894 jơnau sră ƀău tus bal pơrlòng. Tàm khà 157 jơnau sră ƀău mut tàm dar dut ndơl, Mpồl duh broă ai điểm khà jờng neh rơ wah geh 8 khà A, 24 khà B, 46 khà C, 45 khà pơn jờng. Ală ală jơnau sră ƀău tus bal pơrlòng lơh jat ală tơngume dờng bơh cíñ trị, lơh sa, niam chài, mpồl bơtiàn, sền gàr dà lơgar, sền gàr lơngăp lơngai mờ ală gah ndai bơh rài kis dê, yal loh làng ală broă kuơmàng bơh dà lơgar dê tàm nam 2022.

Đơs tàm dơ̆ bơyai lơh, Củ tịc lơgar ồng Võ Văn Thưởng pin dờn, sră ƀău rơp lơh gơs niam kơnòl broă dờng màng, là mpồl lam lài tàm gah bồ tơngoh- niam chài bơh Đảng dê, dipal mờ bơta pin dờn, bơta gơn kơnờm bơh Đảng, Dà lơgar mờ làng bol dê, dipal mờ bơta kuơ bơh dùl rài sră ƀău mờr tòm 100 nam.