Đơs tàm dơ̆ pơrjum, Củ tịc lơgar ồng Võ Văn Thưởng đơs wơl bơhiàn rài lài do jăk chài kơnhoàl ù tiah, kòn bơnus càr Quảng Ninh dê, do là tiah hờ đah tô Dà lơgar; tiah geh dà dờng Bạch Đằng, geh tềl tơngŏ rài lài do jăk chài bơh jơi bơtiàn dê mờ pe dơ̆ tam lơh jai pha ling sò tơm.

Củ tịc lơgar đơs niam bơhiàn tam klăc, bồ tơngoh ngăc ngar is, pràn kơl dang is, ñhăp ñhar, bơceh pa, lơh geh uă cồng nha dờng màng. Lơh sa bơtàu tơnguh pràn, gơguh priă geh càr dê (GRDP) uă mờ kơl jăp, sùm 8 nam tơn, bơh nam 2016 ndrờm gơguh rơlao 10%; tă dia dà lơgar sùm geh tàm mpồl càr, ƀòn dờng lam lài gùt lơgar dê. Càr Quảng ninh neh lơh gơs broă bơ̆t bơtàu ƀòn lơgar pa tàm 3 kấp; lơh geh lài mờ 3 nam broă lơh jơnau kờñ dà lơgar dê tơmù rơƀah kơl jăp tơngai bơh nam 2021 tus 2025. Broă bơ̆t bơtàu, lơh niam Đảng mờ mpồl lơh broă cíñ trị geh sền kwơ, geh uă tam gơl pa.