Củ tịc lơgar ồng Võ Văn Thưởng gờm chờ Đại sứ lơh sir jak ngan tơngai lơh kơnòl broă tàm lơgar Việt Nam mờ uă tă pơgồp kwơ màng tàm broă bơtàu tơnguh bơta gĭt gơ̆p lơh bơyô bal bơh yau mờ sơlơ tơnguh lơh broă bal uă gah đah 2 lơgar dê.

Jờng rơ tàm tơngai pa do, bơta gĭt gơ̆p kă bro đah 2 gah gơguh pràn kơl dang, mơya Củ tịc lơgar đơs là, cồng nha ờ hềt ndrờm pal mờ bơta ƀuơn, bơta pràn mờ kơ̆p kờñ bơh 2 lơgar sơlơ tơnguh lơh broă bal kă bro uă rlau tai. Bàr gah gờñ lơh Khoă pơrjum dơ̆ 24 bơh Ủy ƀan 2 Cíñ phủ Việt Nam mờ Bulgaria bè lơh broă bal lơh sa, kă bro mờ khoa họk- kỹ thuật tàm nam 2023; sồr lơgar Bulgaria gờñ ring bal Hiệp địñ Sền gàr, dong kờl bơcri priă lơgar Việt Nam mờ EU, lơh geh ală bơta ai ală mpồl lơh sa kă bro mờ ală cau bơcri priă EU, Bulgaria mờ Việt Nam tus bal uă ngan rlau tai tàm drà kă bro bal mờ gơ̆p dê. Bàr gah pal pơn jat tai lơh broă bal, dong kờl bal tàm ală dơ̆ cribơyai tàm dunia.