Tàm dơ̆ wă rò, Củ tịc lơgar ồng Võ Văn Thưởng đơs nền, lơgar Việt Nam sùm sền dờng màng gĭt gơ̆p Tam klăc lơh broă bal jŏ jòng tơl ală bơta mờ dà lơgar Nga, sền do là lơgar tam klăc lơh broă bal ai lài khà dùl. Việt Nam kơ̆p kờñ tơnguh lơh broă bal đah lơgar Việt Nam mờ Nga ngai sơlơ gơlòt mŭt ngan ngồn tàm uă broă mờ lơh geh cồng nha, lơh geh bơta kwơ dipal mờ bơta geh ngan bơh bàr jơi bơtiàn dê, tài ring lơngai, kơ̆ kơl jăp mờ bơtàu tơnguh tàm kơnhoàl ù tiah do mờ tàm dunia. Jờng rơ ngan cồng nha lơh broă bal niam bơnĕ bơh gah Anih Cah rña 2 lơgar dê, Củ tịc lơgar Việt Nam ồng Võ Văn Thưởng ring bal broă 2 anih lơh broă lơh sùm broă tàm pơgơl mpồl kwang bàng lòt còp bal mờ gơ̆p; pơgồp bal tàm broă lơh ờs mờng; lơh sùm broă sền swì cồng nha lơh broă bal pah nam mờ bơtơl ală tơngume lơh broă bal pa jăt gùng dà ngai sơlơ dipal mờ bơta geh ngan mờ cồng nha rlau. Củ tịc lơgar pin dờn là tàm tơngai tus, gah Anih Cah rña 2 lơgar rơ̆p pơn jăt tai sơlơ tơnguh lơh broă bal uă rlau tai; tă pơgồp jơh nùs tàm bơta bơtàu tơnguh bơh tơl dà lơgar dê, kung bè lơh kơ̆ kơl jăp gĭt gơ̆p lơh broă bal đah 2 lơgar.