Tàm dơ̆ wă rò, Củ tịc Tập đoàn Huawei ồng Lương Hoa, Củ tịc lơgar ồng Võ Văn Thưởng đơs sùm, ală tŭ tam gơl sồ mờ bơtàu tơnguh lơh sa sồ tàm dunia bơtàu tơnguh mhar ngan. Lơgar Việt Nam sền gròi ngan mờ tơrgùm tam gơl sồ, bơ̆t bơtàu rài lơh sa mờ mpồl bơtiàn sồ. Việt Nam hòi jà bơta lơh broă bal bơh ală gah dê, bơh kâp Cíñ phủ tus dì làng bol dong kờl, lơh broă bal, bơcri priă tàm bơ̆t bơtàu phan bơna sồ, lơh sir adat boh lam dong bơtàu tơnguh lơh sa sồ.

Wă rò ồng Lý Tự Học, Kwang ătbồ Mpồl duh broă Ătbồ kă bro Tập đoàn Trung Hưng (ZTE), Củ tịc lơgar ồng Võ Văn Thưởng jờng rơ cồng nha lơh sa kă bro bơh ZTE dê mờ cồng nha lơh broă bal lơh sa kă bro bơh ZTE dê tàm lơgar Việt Nam, là cau năc, cau tam klăc lơh broă bal dờng gơ wèt mờ uă gah viễn thông lơgar Việt Nam dê. Củ tịc lơgar jờng rơ ngan broă ală cau bơcri priă lơgar Lo neh lam lơh rlau 4 rbô rơndăp broă lơh gam lơh geh cồng nha tàm lơgar Việt Nam mờ kờp jơh priă bơcri geh cih tàm sră pơ àr là rlau 26 tơmàn dolar Mỹ. Tàm hơ̆, ZTE neh geh măt tàm lơgar Việt Nam bơh uă nam do. Củ tịc lơgar pin dờn mờ đơs là, ZTE rơ̆p geh bơta lơh broă bal niam, geh cồng nha rlau mờ ală mpồl lơh sa kă bro tàm Việt Nam tàm tơngai tus; tă pơgồp tàm bơta bơtàu tơnguh bal bơh gĭt gơ̆p lơh broă bal đah Việt Nam mờ Lo.