Ală cau ala mat ala mờr 500 nă cau geh bơngă pin dờn geh sac rơwah bơh ală càr, ƀòn dờng gùt lơgar dê tus bal Broă lơh jờng rơ krơh niam cau pơn rơ jak là cau geh bơngă pin dờn tàm tiah làng bol jơi bơtiàn dồ ết nă cau gùt lơgar nam 2023. Tàm dơ̆ tìp mat, uă cau ala mat cau geh bơngă pin dờn pơn rơ jak yal mờ Củ tịc lơgar mờ đơs mờ ală cau ala mat bè ală broă lơh geh ngan bơh he dê tàm mpồl bơtiàn, bè: bơsram ală broă lơh bơtàu tơnguh lơh sa mờ tơnơ̆ hơ̆ mblàng yal, dong kờl, bơto pơlam làng bol tàm ală tiah, hòi jà làng bol jơh nùs brồ guh tơn jơh jơgloh tơrmù rƀah, tơn jơh bơhiàn bơr ngơl gơla, hòi jà làng bol bơt bơtàu mpồl bơtiàn tam klăc bal, bơt bơtàu mpồl tam klăc dờng jơh gùt jơi bơtiàn...

Chờ hờp tìp mat ală cau ala mat geh bơngă pin dờn pơn rơ jak, Củ tịc lơgar Võ Văn Thưởng đơs sùm, Đảng, Dà lơgar sùm sền gròi, ai lơh jat uă broă lơh sền gròi dong kờl làng bol ală jơi bơtiàn, tàm hơ̆ geh ală broă lơh jơnau kờñ Dà lơgar nàng tơnguh uă rài kis làng bol jơi bơtiàn dồ ết nă cau. Củ tịc lơgar kơ̆p kờñ ală cau kra ƀòn, kwang atbồ ƀòn pơn jat tai mblàng yal, hòi jà làng bol jơi bơtiàn dồ ết nă cau sền gàr, prap gàr, tàm pơr dờn wơl, ngui niam bơta kwơ bơhiàn niam chài niam bơnĕ, pơgồp bơnah lơh geh bơta gơ kờñ ngan bal bơh bơta li la uă bơh bơta niam chài  lơgar Việt Nam dê.