Bè Hìu sơnơm ing kâp 2 sồ 5 (ala Hìu sơnơm ing kâp 2 sồ 4) lơh kơnòl broă tàm lơgar Đah Jum Sudan, Hìu sơnơm geh 63 nă oh mi, tàm hơ̆ geh 11 nă cau ùr geh sac rwah bơh ală Quân khu 5, 7 mờ 9; Quân đoàn 4; Hìu sơnơm Ling klàng 175; Kụk Sền gàr ring lơngai lơgar Việt Nam mờ bàr pe mpồl ndai. Mpồl cau tus bal geh pơlam tàp nền nòn bè jơh broă, geh bal cíñ trị, ling klàng, dong broă măy mok, broă lơh mờng chài gah lơh sơnơm, jơnau gĭt wă sền gàr ring lơngai dipal mờ jơnau gơbàn ngan ngồn, lơh geh wil tơl broă jàu bơh Liên hợp quôk dê mờ jơnau sồr lơh jăt kơnòl broă tàm Mpồl ala măt dê.

Jàu Kơrnoăt, pà bồng bi Dà lơgar ai mpồl cau sền gàr ring lơngai tàm Dơ̆ ai ling lòt lơh broă in, Củ tịc lơgar đơs nền, Đảng, Dà lơgar sùm pin dờn, pơñiờ să bè ală cồng nha neh lơh geh bơh ală mpồl cau sền gàr ring lơngai lơgar Việt Nam dê tàm tơngai lài, mơkung pin dờn ală mpồl geh sồr tus tàm tiah lơh broă ngan ngồn đòm jăt bơta kơ̆ nùs, bồ tơngoh ngăc ngar, bơta pràn jak tàm broă lơh, lơh geh jơnau sồr bơh Liên hợp quôk dê, dipal mờ bơhiàn ờs mờng Cau ling Wa Hồ dê tàm tŭ lơh jăt kơnòl broă sền gàr ring lơngai Liên hợp quôk dê.