Củ tịc lơgar ồng Võ Văn Thưởng tus bal Dơ̆ sơnđờm mut lơh broă Anih pờ tơlik jơnau đơs dê. Tàm dơ̆ mut lơh, Phó Kwang atbồ dờng Anih jơnau đơs Việt Nam ồng Vũ Hải Quang pà gĭt, Anih pờ tơlik jơnau đơs tiah đah Jum tàm gùl dà lơgar là anih lơh broă kwơ màng bơh ală anih lơh broă pờ tơlik jơnau đơs tờm ngan dà lơgar dê, pơgồp bơnah dong Anih jơnau đơs Việt Nam lơh sir niam rlau tai kơnòl broă cíñ trị mờ Đảng bal mờ Dà lơgar dê jàu.

Đơs tàm dơ̆ sơnđờm mut lơh broă, ala mat kwang đơng lam bồ Đảng, Dà lơgar, Củ tịc lơgar ồng Võ Văn Thưởng gờm chờ jơh gùt kwang đơng lam bồ, kwang bàng, cau lơh broă bơh Anih jơnau đơs Việt Nam dê sơnđờm mut lơh broă Anih pờ tơlik jơnau đơs tiah đah Jum tàm gùl dà lơgar di dơ̆ tơngkah kir sơn rai 98 nam Ngai sră ƀăo Kăc màng, đơs sùm, broă do geh gơtha kwơ màng, ai jơnau đơs Việt Nam tus tàm tiah dà lềng, bồt bơlào tàm tiah Jum mat tơngai lik Dà lơgar dê, ală tiah sar lơgar ngài bơh ală càr tiah đah Jum tàm gùl dà lơgar, pơgồp bơnah ai jơnau đơs bơh Đảng, Dà lơgar tus mờ làng bol, cèng ală jơnau yal kwơ màng ngan bè lơh sa, mpồl bơtiàn, ngan là jơnau yal bè trồ tiah lơh aniai, mìu càl rbŭt dờng, dà kŏ dà cò tus mờ làng bol lơh ka, ală jơnau yal bè bơta gĭt gơ̆p lơh broă bal mờ lơgar ndai bơh lơgar Việt Nam dê mờ ală lơgar.