Tàm dơ̆ bơyai lơh broă lơh, Củ tịc lơgar Võ Văn Thưởng jờng rơ uă ngan Mặt trận Dà lơgar Việt Nam, Tổng Liên đoàn Lao động Việt Nam mờ Mpồl Cữ thập đỏ Việt Nam ală nam pa do neh pơgồp bal mờ ală tiah, geh uă jơnau bơceh lơh tus mờ ală tiah sar lơgar ngài tàm jơh gùt lơgar nàng bơyai lơh ală broă lơh sền gròi, dong kờl làng bol.

Tàm broă lơh “Sa tềp kờñ gơboh ” geh bơyai lơh tàm xã Thanh Thủy, kơnhoàl Thanh Chương, geh uă cơldŭ ràng tăc phan sa tềp mờ ală phan bơna kwơ màng nàng drơng broă ờ sa priă ai làng bol in. Rlau 20 tơmàn đong, 6 rơbô nơm hìu bềp tềm pềr năng lượng, dùl hìu bềp sa nggùl ngai hìu bơsram mầm non in, dùl nơm hìu Cữ thập đỏ mờ uă bơnah phan pà neh geh jàu ai ală tiah, hìu bơnhă geh dà kơl hề mờ dà lơgar, hìu bơnhă rƀah, kông ñân kal ke in. Jàu ală bơnah phan pà mờ pơyoa jơnau nting bơr gờm chờ nam pa tus mờ làng bol, Củ tịc lơgar kơ̆p kờñ làng bol rơ̆p pơn jat tai bơt bơtàu bơhiàn niam chài niam ngan bơh jơi bơtiàn dê là tam klăc bal, kờñ gơboh, tam pà bal mờ dong kờl bal mờ gơ̆p, bal mờ gơ̆p bơt bơtàu rài kis ngai sơlơ bơtàu tơnguh, ngan là càr Nghệ An rơ̆p ngan ngồn gơ gơs dùl càr bơtàu tơnguh tŭ ờ gam geh hìu bơnhă rƀah mờ hìu bơnhă ndrờm bè rƀah tai.