Ala mat kwang đơng lam bồ Đảng, Dà lơgar mờ gơnoar broă là dồ nă cau bơsram dờng neh bơsram tàm hìu bơsram do, Củ tịc lơgar Võ Văn Thưởng tơngŏ bơta chờ hờp mờ ngoh rơngăc tŭ rê còp wơl hìu bơsram tàm ală ngai jơh gùt lơgar wèt tus tơngkah kir sơnrai Ngai Cau pơgru Việt Nam 20/11. Củ tịc lơgar kung pơyoa jơnau lùp còp jơh nùs mờ jơnau gờm chờ niam bơnĕ ngan rlau jơh tus mờ ală cau pơgru di ngai 20/11.

Mờ rlau 65 nam bơt bơtàu mờ dờng pràn, mpồl cau pơgru hìu bơsram dê sùm geh bơtơl, geh uă rlau bè khà, bơta pràn jak, bơta gĭt wă, bơta mờng chài lơh broă uă, geh uă bơta mờng chài tàm broă kơlôi sơnơng mờ bơto bơtê. Uă Giáo sư, Tiến sĩ lơh geh uă sră jờng rơ khoa họk bơto bơtê kwơ ngan tàm lơgar mờ lơgar ndai, geh cau bơsram dờng mờ mpồl bơtiàn pin dờn kờñ gơboh mờ ki ngàm. Di dơ̆ do, Củ tịc lơgar kung jàu pà 20 bơnah priă bơsram kờp jơh khà priă 100 tơlak đong ai cau bơsram dờng pơn rơ jak bơh hìu bơsram dê mờ 100 tơlak đong tàm broă lơh dong kờl bơsram sră, dong kờl cau jak chài bơh hìu bơsram dê.