Tàm San Francisco, lơgar Mỹ, tàm tơngume Tơngleh Kwang bàng kấp dờng APEC neh geh bơyai lơh dơ̆ tìp mat ală kwang đơng lam bồ kấp dờng Tơngume lơh broă bal lơh sa Ấn Độ Dương- Thái Bình Dương tài bơtàu tơnguh tai. Củ tịc lơgar Võ Văn Thưởng lam bồ Mpồl kwang bàng kấp dờng Việt Nam tus bal dơ̆ tìp mat mờ geh jơnau đơs, đơs jơnau yal tơngĭt bè chồl tơnguh lơh broă bal lơh sa Ấn Độ Dương- Thái Bình Dương.

Đơs tàm dơ̆ tìp mat, Củ tịc lơgar Võ Văn Thưởng đơs sùm, tơngume lơh broă bal lơh sa Ấn Độ Dương- Thái Bình Dương tài bơtàu tơnguh tai là bơta pơnđơl pràn bal nàng kờñ sơlơ tơnguh lơh broă bal, pơgồp bal đah ală rài lơh sa tàm tơngai dunia kong mờ uă bơta tam gơl, tŭ tơngai niam mờ bơta lòng tàm bơrlŭ bal. Tơngume lơh broă bal lơh sa Ấn Độ Dương- Thái Bình Dương tài bơtàu tơnguh tai geh kơ̆p gơn là broă lơh lơh bal, tàm tơrbŏ bal lơh sa ngăc ngar, geh cồng nha, cèng wơl bơta kwơ geh ngan ai làng bol in, tă pơgồp ai ring lơngai, kơ̆ kơl jăp mờ bơtàu tơnguh tai bơh tàm tiah do mờ gùt plai ù.