Đơs tàm dơ̆ tìp mat, Tổng Giám mụk Tổng Giáo phận Huế Bàp yàng Giuse Nguyễn Chí Linh, Tổng Giám mục Tổng Giáo phận Huế jơh nùs ưn ngài mờ ai lơh chờ hờp ngan geh wă rò Củ tịc lơgar mờ Mpồl kwang bàng lòt còp Toà Tổng giám mụk Huế, nting bơr gờm chờ Ngai Noel làng bol jat yàng Bàp Tổng Giáo phận Huế.

Tổng Giám mụk Tổng Giáo phận Huế Bàp yàng Giuse Nguyễn Chí Linh jờng rơ ngan cồng nha niam bơnĕ bơh ală dơ̆ lòt còp, lơh broă hờ lơgar ndai bơh Củ tịc lơgar Võ Văn Thưởng dê tàm nam 2023; ala mat Dà lơgar Việt Nam tìp mat, lơh broă mờ kwang atbồ lơgar uă lơgar dờng; pơgồp bơnah kuơmàng tơnguh gơnoar broă bơh lơgar Việt Nam dê tàm muh mat dunia: “Mìng is gơ wèt mờ làng bol jat yàng Bàp lơgar Việt Nam, dơ̆ lòt còp Vatican mờ tìp mat Bàp dờng Francis bơh Củ tịc lơgar Võ Văn Thưởng dê là dùl bơta kah yau bềng bơta gơn kơnờm, pin dờn mờ bềng bơta hơ pơrgon. Kuơmàng, làng bol jat yàng Bàp tàm Huế kơnờm dơ̆ lòt còp do mờ sơlơ chờ hờp rlau tai tŭ khi sơnơng là digơlan dùl ngai ờ jŏ khi rơp geh wă rò Bàp dờng Francis tàm Ù tiah ndu gơn rơh La Vang. Gơ wèt mờ să tờm añ den bơdìh mờ bơta chờ hờp pa yal, añ niam nùs ngan bè bơta git gơp đah ală mpồl lơh broă geh gơnoar mpồl bơtiàn mờ làng bol jat yàng Bàp ngai sơlơ ram mhŭ, ngai sơlơ gơ tàm sòr, ngai sơlơ đềt mềr mờ tàm kờñ gơboh rlau”.

Chờ hờp lòt còp Toà Tổng Giám mụk Huế tàm nùs nhơm rềp ngai Noel, Củ tịc lơgar Võ Văn Thưởng pơyua jơnau nting bơr niam bơnĕ bơh Kwang đơng lam bồ Đảng, Dà lơgar tus Tổng Giám mụk Bàp yàng  Giuse Nguyễn Chí Linh, Tổng Giám mụk Tổng giáo phận Huế; ală cau kơ đơng yàng, cau duh broă yang mờ làng bol jat yàng Bàp Tổng Giáo phận Huế wă rò dùl kàl Noel lơngăp lơngai; dùl nam pa ring lơngai, chờ hờp.

Yal bè ală bơta dà lơgar dê, Củ tịc lơgar pà git, nam 2023, dà lơgar neh lơh geh ală cồng nha geh dunia jờng rơ ngan, tàm hơ̆ geh bơta tă pơgồp kuơmàng bơh mpồl bơtiàn jat yàng Bàp gùt lơgar. Mờ gùng dà “Kis lơh àng sơdah jơnau yàng tàm nùs nhơm jơi bơtiàn nàng drơng bơta chờ hờp bơh làng bol dê in”, làng bol jat yàng Bàp neh jơh nùs tus bal ală srơh tàm pơrlòng kờñ gơboh dà lơgar bơh Mặt trận dà lơgar Việt Nam mờ ală mpồl bal, mpồl cau lam lơh; kuơmàng pơn rơ ngan là broă lơh sền gàr dong kờl mpồl bơtiàn, lơh broă niam dong kờl cau, lơh sơnơm, bơto bơsram, cèng nùs nhơm kờñ gơboh, drơng tus làng bol in, ngan là mpồl cau ờ sô ờ soàn tàm mpồl bơtiàn bè: kơnòm dềt rƀah, ờ geh anih kơldìng, cau kra kis dùl nă să, cau gơtìp kòp kơnjơ̆ sơbơng roh, cau kòp HIV/AIDS…

Củ tịc lơgar Võ Văn Thưởng kung neh kĭ Sră jà Bàp dờng Francis lòt còp lơgar Việt Nam; kơp kờñ Mpồl cau jat yàng Bàp Việt Nam tàm pơgồp bal mờ ală anih lơh broă dà lơgar nàng gờñ geh tŭ niam wă rò Bàp dờng lòt còp: “Añ kah tàm sră pơyua bơh Bàp dờng Francis dê pơyua Mpồl cau jat yàng Bàp Việt Nam tơnơ̆ tŭ añ geh dơ̆ lòt còp tus Hìu yàng Bàp, tìp mat mờ Bàp dờng, geh dùl jơnau đơs, nùs nhơm kờñ gơboh Yàng dê mờ nùs nhơm kờñ gơboh kòn bơnus là 2 bơta bơh dùl kak priă dê. Mờ añ kung kah là tàm Sră goh geh jơnau cih drơng broă làng bol he in kung là dùl broă lơh nàng drơng broă Yàng in. Añ gŏ làng bol jat yàng Bàp bơh Tổng Giáo phận Huế dê tơngai lài neh lam lơh niam ngan kơnòl broă duh rơngòt Yàng, kờñ gơboh bal mờ gơp, bơh hơ̆ pơgồp bơnah sơlơ chồl pràn bơtaù tơnguh lơh sa- mpồl bơtiàn bơh tiah do, dà lơgar dê, pơgồp bơnah lơh rài kis làng bol dê ngai sơlơ niam rlau”.

Củ tịc lơgar Võ Văn Thưởng đơs loh, tàm Pơrjum dơ̆ 8 Ƀan Cấp hàñ Đảng dà lơgar neh ai tơlik Nghị quyết bè pơn jat tai đòm jat bơhiàn bơh yau, sơlơ tơnguh tai bơta pràn tam klac dờng gùt jơi bơtiàn, bơt bơtàu dà lơgar he ngai sơlơ bơtàu tơnguh, gơboh gơbài. Nghị quyết đơs nền, tam klac dờng gùt jơi bơtiàn là bơhiàn bơh yau kuơmàng bơh jơi bơtiàn Việt Nam dê; là gùng dà broă lơh kuơmàng geh lam lơh sùm bơh Đảng dê, là bơta tờm bơh bơta pràn jơi bơtiàn dê. Củ tịc lơgar đơs là, kờñ bè hơ̆ den pal geh bơta tam klac bal tàm làng bol, tam klac bal đah ală cau jat yàng mờ cau ờ jat yàng, đah cau jat yàng do mờ cau jat yàng ndai; tam klac bal đah cau Việt Nam tàm lơgar mờ cau Việt Nam tàm lơgar ndai. Bơh bơta hơ̆, Củ tịc lơgar kơp kờñ, mờ gơnoar broă là Tổng Giám mụk Giáo phận Huế, Tổng Giám mụk Bàp yàng Giuse Nguyễn Chí Linh rơp pơn jat tai tề lam, pơn jờng, hòi jà làng bol jat yàng Bàp Tổng Giáo phận Huế pơn jat tai tơnguh nùs nhơm duh rơngòt Yàng, kờñ gơboh dà lơgar; kờñ gơboh Yàng mờ kờñ gơboh làng bol nàng ngai sơlơ geh uă rlau tai ală broă lơh kis niam lơh àng sơdah jơnau yàng; bal mờ gơp bơt bơtàu dà lơgar ngai sơlơ bơtàu tơnguh mờ gơboh gơbài.