Tàm dơ̆ tìp mat cribơyai, tàm nùs nhơm lơh bơyô bal, rêp mềr mờ pin dờn bal, Củ tịc lơgar Võ Văn Thưởng mờ Thủ tướng lơgar Nhờk Kishida đơs wơl bơta gĭt gơ̆p đah 2 lơgar dê tàm 50 nam do mờ tơngŏ bơta di nùs bè bơta bơtàu tơnguh pràn kơl dang, tơl làm, lơh broă ngan ngồn tàm jơh ală gah bơh bơta gĭt gơ̆p 2 lơgar dê.

Jat tàm tơngume bơta gĭt gơ̆p pa, 2 nă kwang đơng lam bồ neh ring bal bè gùng dà broă lơh dờng mờ ală broă lơh nàng kờñ lơh jrô ơnàng làm uă rlau tai lơh broă bal 2 lơgar dê, pơn jat tai lam lơh geh cồng nha ală gùng dà broă lơh tìp mat cribơyai lơh broă bal neh geh đah ală Ƀộ, ngàñ 2 lơgar mờ chồl tơnguh lơh ală gùng dà broă lơh lơh broă pa; sơlơ tơnguh lơh broă bal geh mut lơh ngan ngồn, geh cồng nha tàm gah sền gàr Dà lơgar jat tàm Jơnau yal bơr Sền sơnơng bal bè lơh broă bal sền gàr Dà lơgar đah lơgar Việt Nam mờ Nhờk. Bè lơh broă bal lơh sa, 2 nă kwang đơng lam bồ ring bal pơn jat tai sơlơ tơnguh lơh broă bal lơh sa đah 2 lơgar, chồl tơnguh lơh broă bal nàng gàr niam lơngăp lơngai lơh sa mờ rề ơnàng lơh broă bal tàm ală gah pa bè tam gơl pa bơceh lơh, tam jàu kông nghệ, tam gơl sồ, tam gơl tơlir...