Là kwang đơng lam gah lơh sa geh pơnrơ ngan bơh mpồl APEC dê đơs tàm bơnah cri bơyai, Củ tịc lơgar Võ Văn Thưởng đơs nền tam gơl trồ tiah là bơta jal mhar gùt plai ù, den tàng pal lơh ngan, geh kơnòl cíñ trị kung bè broă tam klăc bal bơh jơh ală gah lơh sa dê.

Củ tịc lơgar tam pà bal nùs nhơm bơh lơgar Việt Nam dê sền broă rơcang sơndră mờ tam gơl trồ tiah là broă geh ai lài ngan tàm broă bơtàu tơnguh dà lơgar mờ hơ geh lơh pràn kơl dang bè jơnau kờñ tơlik nhơm ƀơ̆ ndrờm “0” tàm nam 2050, tơmù broă tơlik nhơm mêtan, sền gàr brê mờ tam gơl năng lượng. Củ tịc lơgar hòi jà mpồl APEC mờ ală lơgar lơh broă bal lơh pràn broă lơh broă bal bè năng lượng lơh geh wơl mờ tơlir jơh ală gah lơh sa mờ măi mŏk; bơtàu tơnguh lơh sa suơn sre kloh niam mờ brồ guh wơl phan geh is; rài kis broă lơh sa mpồl bơtiàn mờ tam gơl ndrờm bal.