Rơndăp ù tiah càr Quảng Ngãi tơngai bơh nam 2021 tus 2030, wèt tus nam 2050 geh Thủ tướng Cíñ phủ kĭ ngai 22 nhai 11 nam 2023, mờ 3 jơnau kơlôi sơnơng jŏ jòng: Quảng Ngãi bơtàu tơnguh ai bơh tàm ală bơta pràn is bơh càr do dê-wèt tus broă lơh bơtàu tơnguh lam lài kơl jăp; dơ̆ bàr là Quảng Ngãi-dùl anih tus pa, tiah tờm tàm gơl gùng tiah lơh sa kwơmàng tiah tàm gùl lơgar dê; mờ pe là Quảng Ngãi ngui niam bơta kwơ geh is nàng gơgơs là Tiah tờm dong broă anih ơhò ơm dà lềng, lơh sa dà lềng-bồt bơlào gùng kềng lơh sa Đah măt tơngai lik-Đah măt tơngai mŭt. Rơndăp ù tiah geh 4 gùng kềng lơh sa jŏ jòng, 6 ù tiah lơh sa pràn mờ 2 anih tờm gơn kơnờm gơguh lơh sa, 3 tiah tờm tiah drà.

Càr geh jơnau kờñ lơh geh Anih tờm jồr jờu mờ năng lượng dà lơgar tàm Tiah lơh sa Dung Quất mờ bơtàu tơnguh bồt Lý Sơn gơgơs là Tiah tờm lòt nhơl dà lềng-bồt bơlào.

Tàm pơrjum, Củ tịc lơgar Võ Văn Thưởng mờ ală kwang đơng lam bồ, kwang bàng ala măt  neh lơh jăt broă ai sơnđờm lơh Rơndăp broă lơh gùng Hoàng Sa-Dốc Sỏi; sền kwang bàng đơng lam bồ càr Quảng Ngãi jàu Kơrnoăt ring bal gùng dà bơcri priă gơwèt mờ ờ uă rơndăp broă lơh bơtàu tơnguh tiah drà, lơh sa mờ măi mŏk tàm càr do.