Củ tịc lơgar Võ Văn Thưởng chờ gờm Củ tịc Quốk hội lơgar Bulgaria còp mùl màl lơgar Việt Nam di tàm tŭ bồ nam pa 2024, tơlik nùs nhơm sền kwơ mờ pin dờn bè cíñ trị uă tàm bơta git gơ̆p lơh broă bal đah bàr lơgar. Ồng Rossen Dimitrov Jeliazkov yal mờ Củ tịc lơgar bè dơ̆ cri bơyai geh cồng nha niam bơnĕ ngan mờ Củ tịc Quốk hội Vương Đình Huệ mờ đơs nền, kơ̆p kờñ bàr gah lơh jăt niam ală kơrnoăt lơh broă bal tŭ do geh, tàm hơ̆ geh dơ̆ pơrjum bơh Ủy ƀan bàr Cíñ phủ Việt Nam mờ Bulgaria.

Tàm dơ̆ tus còp, Mpồl kwang bàng neh lơh broă tàm ờ uă càr, ƀòn dờng, bơh tŭ hơ̆ sền gŏ bơta geh lơh broă bal gam uă ngan đah ală càr, ƀòn dờng bơh bàr lơgar dê, pờ geh dơ̆ niam lơh broă bal bè lơh sa kung bè lơh pràn tìp bal làng bol; pơn jờng lơgar Việt Nam neh ai cau jăk bơto dà đơs lơgar Việt Nam tàm lơgar Bulgaria in. Củ tịc lơgar Võ Văn Thưởng đơs nền, lơgar Việt Nam sền kwơ bơta git gơ̆p mờ lơgar Bulgaria, tàm tơngai tus, Củ tịc lơgar kơ̆p kờñ bàr gah pal lơh pràn rơlao tai bơta git gơ̆p cíñ trị lơh broă bal mờ lơgar ndai, kơ̆p kờñ gờñ geh wă Kwang atbồ lơgar Bulgaria kung bè ală kwang đơng lam kấp dờng mờ ală kấp bơh lơgar Bulgaria tus còp lơgar Việt Nam.