Wă Đại sứ New Zealand, Củ tịc lơgar Võ Văn Thưởng jờng rơ Đại sứ neh geh ală tă pơgồp jơh nùs mờ geh cồng nha, lơh niam rlau tai bơta git gơp lơh bơyô bal mờ lơh broă bal đah Việt Nam mờ New Zealand. Củ tịc lơgar kơp kờñ, tơngai tus bulah tàm gơnoar broă lơi, Đại sứ kung sùm lời ai nùs nhơm kờñ gơboh mờ sơlơ tơnguh bơta git gơp lơh broă bal Việt Nam – New Zealand.

Wă Đại sứ lơgar Peru Augusto Morelli, Củ tịc lơgar nting bơr gờm chờ ồng Đại sứ neh lơh gơs niam ngan tơngai lơh broă 6 nam tàm Việt Nam, tă pơgồp jơh nùs mờ geh cồng nha tàm broă sơlơ tơnguh bơta git gơp niam bơnĕ đah Việt Nam mờ Peru. Peru là lơgar lơh broă bal kuơmàng ngan Việt Nam dê tàm ală lơgar tiah câu Mỹ Latiñ mờ neh jơh nùs tam pà broă wèt sền, tàm dong kờl bal mờ gơp tàm ală dơ̆ cribơyai tàm tiah do mờ tàm dunia. Củ tịc lơgar nting bơr Đại sứ lơh gơs niam kơnòl broă tàm gơnoar broă pa mờ sùm wèt tus broă sơlơ tơnguh bơta git gơp niam bơnĕ đah Việt Nam mờ Peru.