Củ tịc lơgar đơs nền, Việt Nam lài bè tơnơ̆ mìng dùl lơm, sền dờng màng bơta git gơp lơh bơyô bal ờs mờng niam bơnĕ mờ lơgar Campuchia; chờ hờp tŭ bơta git gơp 2 lơgar ngai sơlơ bơtàu tơnguh ngan ngồn mờ tơl làm tàm jơh ală bơta. 

Củ tịc lơgar đơs nền, Việt Nam sùm cih kah bơta dong kờl jơh nùs jơh tồr bơh làng bol Campuchia dê tàm ală dơ̆ tam lơh sền gàr dà lơgar lài do kung bè tàm broă lơh bơt bơtàu mờ bơtàu tơnguh dà lơgar tŭ do. Bal mờ bơta tơrbŏ bal bè ù tiah, niam chài, làng bol 2 lơgar neh lòt bal mờ gơp, tàm dong kờl gơp dră wơl bol sò tơm bal, bal mờ gơp sơrlèt gan kal ke, rềs àr mờ tŭ do bal mờ gơp lơh broă bal bơtàu tơnguh dà lơgar bơh tơl lơgar dê. Củ tịc lơgar ai lơh chờ hờp ngan sền gŏ ală kwang đơng lam bồ lơgar Campuchia ndrờm lời nùs nhơm niam bơnĕ ai Việt Nam in, kơp kờñ tàm pơn jat tai ală rơnàng kwang đơng lam bồ lòt lài, lơh niam rlau tai bơta git gơp lơh bơyô ờs mờng đah Việt Nam mờ Campuchia.