Tàm nùs nhơm lơh bơyô bal, đềt mềr, Củ tịc lơgar Võ Văn Thưởng ưn ngài ală kwang bàng tàm Mpồl tam klăc bal Nghị sĩ lơh bơyô bal đah lơgar Nhờk mờ Việt Nam neh sùm sền gròi, lời ală nùs nhơm lơh bơyô bal, song dơ pă jơh nùs ai dà lơgar mờ làng bol lơgar Việt Nam in mờ geh uă tă pơgồp jơh nùs, geh cồng nha ai bơta bơtàu tơnguh bơh gĭt gơ̆p 2 lơgar dê. Đơs nền gĭt gơ̆p 2 lơgar geh uă bơta gơn kơnờm bơtàu tơnguh nàng lơh geh uă bơta bơtàu tơnguh rlau tai tàm tơngai tus.

Củ tịc lơgar Võ Văn Thưởng sồr Củ tịc Mpồl tam klăc bal Nghị sĩ lơh bơyô bal đah lơgar Nhờk mờ Việt Nam pơn jăt tai sền gròi, chồl tơnguh gĭt gơ̆p lơh broă bal đah 2 Quôk hội, pơn jăt tai lam ală mpồl nghị sĩ lòt còp lơgar Việt Nam, sơlơ tìp măt lơh kwèng bal nghị sĩ, ală kwang đơng lam bồ kơnòm să, ùr nghị sĩ 2 lơgar dê; lơh niam gơnoar broă cau lơh kòn gùng bơh ală mpồl Nghị sĩ lơh bơyô bal dê, mơkung sơlơ lơh broă bal tàm ală gah broă pa bè tam gơl sồ, tam gơl tơlir, lơh broă sa sươn sre măy mok pa, bơto bơtê, lơh broă mờ lòt nhơl...