Sơnđờm pờ tàm Anih sơñio rùp Việt Nam bơh nam 2014 tus tŭ do, broă lơh “Broă niam” neh yal tơngĭt rlau 2 rbô 200 jơnau yal bè nùs nhơm niam geh lơh gơrề uă tus cau sền ti vi, lơh gơs rùp rài kòn bơnus mờ dà lơgar Việt Nam niam, bềng nùs kờñ gơboh kòn bơnus.

Củ tịc lơgar đơs sùm, ală jơnau yal mờ broă lơh “Broă niam” bơh Anih sơñio rùp Việt Nam dê neh yal tơngĭt, lơh gơrề uă cèng wơl ală nùs nhơm niam bơnĕ, geh bơta kwơ lơh gơ tam gơl nùs nhơm, lơh gơlik bơta gơdan gơkờñ uă ngan. Củ tịc lơgar kơ̆p kờñ Broă lơh “Broă niam” jòi tai uă cau pơnrơ jak, uă krơh, uă broă niam tàm làm jơh ù tiah dà lơgar dê, nàng gơtùi jờng rơ, rề ơnàng lơh uă ală broă niam geh gơrề làm uă jrô ơnàng tus jơh tơl nă làng bol tàm jơh gùt lơgar. Bơh hơ̆ gơchul gơchồl mpồl bơtiàn lơh broă, pơgồp bơta pràn lơh gơs rùp rài dà lơgar Việt Nam niam, bềng nùs kờñ gơboh kòn bơnus.