Tàm tơngume lòt còp ngan ngồn lơgar Nhờk, Củ tịc lơgar Võ Văn Thưởng neh dơ̆ dùl dơ̆ wă Thủ tướng, Phó Củ tịc Đảng Dân củ khat gơboh lài do lơgar Nhờk dê (LDP) Aso Taro, Củ tịc Đảng Công Minh Yamaguchi Natsuo, Củ tịc Đảng Kộng sản lơgar Nhờk Shii mờ Mpồl ală Nghị sỹ, cau bơyô lơgar Nhờk rềp mềr mờ lơgar Việt Nam.

Tàm ală dơ̆ wă, Củ tịc lơgar Võ Văn Thưởng đơs loh, bơta gĭt gơ̆p đah lơgar Việt Nam mờ Nhờk neh geh tơnguh tus gơnoar broă Lơh broă bal kwơ màng tơl làm tài bơta ring lơngai mờ bơtàu tơnguh tai tàm câu Á mờ tàm dunia mờ gam ơm tềng đap tŭ tơngai niam nàng bơtàu tơnguh rlau tai tàm tơl gah broă, ngan là tàm ală gah broă pa mờ bơta wèt sền lơh broă bal tàm 50 nam pơn jat tai. Củ tịc lơgar sồr ală kwang bàng cíñ trị lơgar Nhờk sền gròi, chồl tơnguh lơh ngan ngồn ală tơngume lơh broă bal 2 lơgar dê tàm tơngume gĭt gơ̆p pa. Ală kwang đơng lam bồ, Nghị sỹ đơs nền rơ̆p pơnđơl pràn lơh ngan jơh nùs jơh tồr nàng tă pơgồp tàm bơta bơtàu tơnguh bơta gĭt gơ̆p lơh broă bal đah lơgar Việt Nam mờ Nhờk, tàm hơ̆ geh sơlơ tơnguh tìp mat lơh kwèng đơng lam bồ kơnòm să, Nghị sỹ kơnòm să 2 lơgar dê.