Củ tịc lơgar ồng Võ Văn Thưởng đơs nền, làng bol 2 lơgar Việt Nam – Cuba sùm tam klac bal, tam pà bal ală kal ke tàm ală tŭ tơngai kac màng; sền gròi, tàm pơn jờng gơp sơrlèt gan bơta lòng. Củ tịc lơgar đơs sùm: Đảng, Dà lơgar, làng bol Việt Nam chờ hờp ngan tài bơta tam klac kuơmàng mờ bơta git gơp lơh broă bal Việt Nam – Cuba bơtàu tơnguh ngan ngồn tàm uă gah broă. Củ tịc lơgar ồng Võ Văn Thưởng sồr, bal mờ sơlơ tơnguh rlau tai ală dơ̆ cribơyai kwang bàng kâp dờng, 2 gah pal sơlơ tơnguh tai ală broă lơh tìp mat lơh kwèng, lơh broă bal đah Ƀộ Quôk phòng Việt Nam mờ Ƀộ ală mpồl phàu crong kac màng Cuba. Tàm tŭ tơngai dunia gam geh uă bơta kal ke, bơta git gơp lơh broă bal sền gàr dà lơgar đah 2 lơgar geh gơtha kuơmàng ngan. Đảng, Dà lơgar Việt Nam sùm lơh gơlik bơta niam nàng Ƀộ Quôk phòng pơgồp bal, tam pà bal, lơh broă bal mờ Ƀộ ală mpồl phàu crong kac màng Cuba tàm ală gah broă mờ 2 gah geh bơta pràn mờ geh jơnau kờñ lơh broă bal.