Tơnơ̆ tŭ iăt sền jơnau yal broă lam lơh jăt Kơrnoăt sồ 59 bơh Quôk hội dê bè gùng dà bơcri priă lơh rơndăp broă lơh bơcri priă lơh gùng ù gờl lòt mhar Biên Hoà- Vũng Tàu tơngai dơ̆ dùl mờ broă lam lơh jăt 03 rơndăp broă lơh bơnah, tàm hơ̆ geh rơndăp broă lơh bơnah 03 bơh Ủy ƀan Ñân zân càr Bà Rịa- Vũng Tàu là anih lơh broă tờm ătbồ, Củ tịc Quôk hội Vương Đình Huệ đơs là, tus tŭ do, Bà Rịa- Vũng Tàu neh lơh sir broă lơh sờr ntrờn bơnàng ù, jàu nàng lơh rơndăp broă lơh.

Củ tịc Quôk hội tơlik nùs nhơm gơn kơnờm, tàm nùs nhơm bơh càr Bà Rịa- Vũng Tàu dê là sơrbac mhar ngan, kràñ cê jơh nùs ngan, lam lơh mhar ngan gơl gùng lòt gan tiah he dê mờ broă lơh bè hơ̆, rơndăp broă lơh rơ̆p lơh sir ờ gŏ di mìng di tơngai lơm mờ gam lơh sir lài mờ tơngai jàu tai.