Tus bal dơ̆ wă rò Củ tịc Quốk hội lơgar Bulgaria tàm Hìu bơsram Đại họk Dà lơgar Hà Nội geh Phó Củ tịc Quốk hội, Củ ñiệm Ủy ƀan Lơh broă bal mờ lơgar ndai Quốk hội, Phó Củ ñiệm Ủy ƀan cri bơyai broă mờ lơgar. Tàm dơ̆ wă, Kwang atbồ Hìu bơsram Đại họk Dà lơgar Hà Nội Lê Quân tơlik nùs nhơm pơnyờ să tŭ geh wă rò Củ tịc Quốk hội lơgar Bulgaria bal mờ mpồl kwang bàng ala măt kấp dờng neh tus còp mờ tìp bal mờ cau pơgru, cau bơsram dờng tàm hìu bơsram.

Mờ bơhiàn lơh broă bal niam bơnĕ đah bàr lơgar dê, Kwang atbồ hìu bơsram Lê Quân pin dờn Hìu bơsram Đại họk Dà lơgar Hà Nội bal mờ ală hìu bơsram đại họk tàm lơgar Bulgaria geh dơ̆ nàng cri bơyai, lơh broă bal nền nòn rơlao tàm gah bơto bơtê mờ bơsram, kơlôi sơnơng khoa họk, do kung là ală bơta tờm ngan ai bơta git gơ̆p lơh broă bal kơl jăp đah bàr lơgar dê. Củ tịc Quốk hội lơgar Bulgaria pơyoa jơnau chờ gờm tus mpồl kwang đơng lam bal mờ cau bơsram dờng tàm Hìu bơsram Đại họk Dà lơgar Hà Nội mờ mblàng tơngu me “Bơta git gơ̆p bal đah lơgar Bulgaria mờ Việt Nam bơh nùs nhơm sền gròi bơh ală rài lơh sa mờ bơta niam chài”.