Drim ngai 14/06, tàm Hìu lơh broă Quôk hội, Củ tịc Quôk hội ồng Vương Đình Huệ mờ Phó Củ tịc Thường trựk Quôk hội ồng Trần Thanh Mẫn đơng lam bal dơ̆ pơrjum lơh broă mờ Kwang đơng lam bồ Quôk hội mờ Mpồl jat sền bơh Ủy ƀan Thường vụ Quôk hội dê bè “Broă lơh jat Nghị quyết sồ 88 mờ Nghị quyết sồ 51 bơh Quôk hội dê bè tam gơl jơnau bơto bơtê, sră giáo khoa bơto bơtê pe kấp”.

Đơs tàm dơ̆ pơrjum, Củ tịc Quôk hội ồng Vương Đình Huệ pà gĭt, do là dùl tàm 4 tơngume mìng dùl lơm nàng jat sền bơh Quôk hội, Ủy ƀan Thường vụ Quôk hội dê tàm nam 2023. Cồng nha tơnơ̆ 9 nhai jat sền neh geh 63 mpồl kwang bàng Quôk hội, 48 Hội đồng Ñân zân kấp càr neh yal cồng nha geh gơrềng tus tơngume do. Củ tịc Quôk hội đơs sùm, jơnau rcang cih Nghị quyết là broă lơh dŭt ndơl bơh mpồl jat sền dê, den tàng, kờñ pal đơs ală bơta di, bơta ờ hềt di, bơta gam gơkòl, bơta ờ niam, geh lơh tìs là ờ, jơnau tờm gơtùi gĭt lài, mờ ờ gơtùi gĭt lài là bè lơi, kơnòl broă bè lơi mờ Mpồl jat sền ai tơlik jơnau đơs, jơnau sồr lơi? Ală tơngume do lơh bơnàng jă nàng Mpồl jat sền in sồr ală anih lơh rboă, mpồl lơh broă lơh jat.