Củ tịc ồng Hun Sen đơs nền, Campuchia ờ tŭ lơi hŭi bơta dong kờl jơh nùs jơh tồr bơh lơgar Việt Nam dê tàm tơngai lài do kung bè tŭ do. Tềng đăp ală bơta lòng bal bơh tàm tiah do mờ gùt plai ù tŭ do dê, 2 lơgar sơlơ pal đềt mềr, lơh broă bal niam rlau tai tàm jơh ală gah broă cíñ trị, lơh sa, kă bro phan, sền gàr Dà lơgar, lơngăp lơngai.

Củ tịc Quôk hội ồng Trần Thanh Mẫn đơs nền, Đảng, Dà lơgar Việt Nam sùm sền dờng màng mờ ai lài uă ngan ai broă bơt bơtàu mờ sơlơ tơnguh tai bơta gĭt gơ̆p lơgar rềp bal niam bơnĕ, lơh bơyô bal, lơh broă bal tơl làm, kơ̆ kơl jăp jŏ jòng Việt Nam mờ Campuchia, tài bơta kwơ bơh làng bol 2 lơgar dê, tài ring lơngai, kơ̆ kơl jăp, lơh broă bal mờ bơtàu tơnguh bal tàm tiah do mờ tàm dunia. Củ tịc Quôk hội sồr 2 gah pơn jat tai tam gơl pa mờ lơh li la ngan ngồn ală broă lơh mblàng yal nàng làng bol, is ồn gơwèt mờ rơnàng kơnòm să 2 lơgar in gĭt wă di ngan bè bơta gĭt gơ̆p bơh yau tam klăc bal lơh bơyô bal, lơh broă bal tơl làm đah Việt Nam mờ Campuchia.