Mờ mờr 30 broă lơh, dơ̆ lòt lơh broă bơh Củ tịc Quôk hội dê neh geh cồng nha niam bơnĕ ngan. Tàm dơ̆ lòt còp ngan ngồn lơgar Campuchia, Củ tịc Quôk hội ồng Trần Thanh Mẫn tìp mat kấp dờng Bơtau lơgar Campuchia ồng Norodom Sihamoni; tìp mat kấp dờng Củ tịc Đảng, Củ tịc Thượng viên lơgar Campuchia ồng Hun Sen; tìp mat kấp dờng Thủ tướng lơgar Campuchia ồng Hun Manet; pơrjum bơyai mờ Củ tịc Quôk hội lơgar Campuchia ồng Samdech Khuon Sudary…

Tàm dơ̆ pơrjum bơyai mờ Củ tịc Quôk hội lơgar Campuchia, 2 nă kwang đơng lam bồ đơs bal là, 2 Quôk hội pal pơn jat tai lơh jat niam gơnoar broă Anih lơh broă lơh Adat boh lam 2 lơgar tàm broă sơlơ tơnguh tai bơta gĭt gơ̆p đah 2 gah; jat sền, sơlơ tơnguh tai ală ƀộ, gah broă, ală tiah, ală mpồl lơh sa kă bro jơh nùs lam lơh geh cồng nha ală Jơnau hơ pơrgon, Jơnau hơ nền, Jơnau ring bal neh kĭ hơ; sơlơ tơnguh tai tàm yal tơngĭt jơnau yal, tam pà bal mờng chài tàm bơyai lơh broă lơh bơh Quôk hội dê dồ bă geh cồng nha, ngan là tàm broă lơh kơrnoăt boh lam, ală adat boh lam mờ jat sền lam lơh jat adat boh lam, tă pơgồp tàm jơnau lơh nền gùng dà broă lơh kwơ màng bơh tơl lơgar dê.