Đơs tàm dơ̆ tìp măt, Củ tịc Quốk hội ồng Vương Đình Huệ pà git, tŭ do lơgar he neh geh mpồl cau lơh sa kă bro tus git nđờ tơlăk nă; gam atbồ, đơng lam rơlao 900 rơbô mpồl lơh sa kă bro, tàm hơ̆ geh 98% là mpồl lơh sa kă bro cau dùl nă să lơh is. Củ tịc Quốk hội ồng Vương Đình Huệ pà git, Đảng, Dà lơgar he sùm sền kwơ gơnoar broă bơh mpồl lơh sa kă bro, cau lơh sa kă bro gơwèt mờ broă bơtàu tơnguh dà lơgar.

Củ tịc Quốk hội đơs nền, Nghị quyết sồ 41 bơh Ƀộ Cíñ trị bè bơ̆t bơtàu mờ ngui gơnoar bơh mpồl cau lơh sa kă bro Việt Nam tàm tơngai pa neh ai geh ală nùs nhơm, gùng dà broă lơh pa, di pal mờ jơnau kờñ bơtàu tơnguh bơh mpồl cau lơh sa kă bro bal mờ jơnau kờñ bơh dà lơgar dê. Den tàng, bơtàu tơnguh mpồl lơh sa kă bro kòn cau,  kờñ ngan bơtàu tơnguh mpồl cau lơh sa kă bro Việt Nam geh nùs nhơm niam, bơta niam chài kă bro geh uă bơta niam jơi bơtiàn kòn cau dê, geh kơnòl mpồl bơtiàn bơh broă lơh geh, ròng siam bơto bơtê cau geh bơta niam chài, ngui bơta kwơ ờs mờng niam bơnĕ tàm ală hìu cau lơh sa kă bro dê.