Hìu măi kơphê Sơn La kờp jơh priă bơcri lơh 260 tơmàn đong, mờ bơta pràn lơh gơlik phan 50 rơbô tấn plai kơphê ris dùl nam, ndrờm mờ 12 rơbô 500 tấn kơphê gar dùl nam. Mờ bơta ƀuơn bè trồ tiah, ù tiah, gơ dờp nàng bơtàu tơnguh lơh sa suơn sre phan bơna, tơrgùm, lơh dờng, càr Sơn La neh tơrgùm tam uă tờm chi sa plai, tờm tào mờ tờm kơphê Arabica. Tơnơ̆ 30 nam bơtàu tơnguh, tus tŭ do càr neh geh rlau 20 rơbô tờm kơphê Arabica, geh tus 41,2% bă ù tam kơphê Arabica bơh gùt lơgar dê; là càr geh bă ù tam kơphê Arabica dờng ngan rlau jơh gùt lơgar.

Phó Ƀí thư Lơh broă sùm Tỉñ ủy càr Sơn La ồng Lò Minh Hùng đơs là, broă ai lơh broă Hìu măi kơphê Sơn La tàm kơnhoàl Mai Sơn, càr Sơn La, di pal mờ gùng dà pơlam bơtàu tơnguh lơh sa- mpồl bơtiàn mờ gah broă lơh lài gơ hòi gơ jà bơh càr dê tàm tơngai bơh nam 2020-2025; là cơng tàng loh làng ai broă ai gùng dà broă lơh bơh Đảng, Dà lơgar dê tàm rài kis; geh kơ̆p gơn rơ̆p cèng wơl bơta kwơ dờng ai cau bơcri priă lơh in, bơsong ală bơta lòng, bơta ờ niam tàm broă tam uă kơphê bơh càr dê.