Củ tịc Quốk hội ồng Vương Đình Huệ tus bal dơ̆ lơh chờ do. Do là broă lơh geh kwơ màng ngan, là dơ̆ niam nàng càr Sơn La mờ ală càr tàm tiah hờ đah tô măt tơngai mŭt dà lơgar yal phan geh lơh bơh kơphe Arabica; pơn jờng cau tam, lơh, kă bro mờ tăc kơphe mờ lơgar bơdìh; pơgồp bal tàm broă bơtàu tơnguh tiah tam kơphe Arabica geh bơta niam uă, kơl jăp.

Tŭ do, phan geh lơh bơh kơphe càr Sơn La dê neh geh tăc tus drà kă bro 20 lơgar gơwèt mpồl tam klăc câu Âu, Đah tô câu Mỹ, Trung Đông mờ ală lơgar tàm mpồl ASEAN mờ priă tăc kơl jăp tàm khà geh uă; pơgồp bal tàm broă tơnguh uă priă geh bơh cau tam, lơh kơphe, ai geh broă lơh tai, pơgồp bal tàm broă geh lơh niam wơl broă lơh sa jăt gùng dà tơnguh uă bơta niam mờ bơta kwơ bơh kơphe tàm càr Sơn La dê.

Di nhai lơh broă uă tài cau rơƀah nam 2023, Củ tịc Quốk hội ồng Vương Đình Huệ bal mờ Mpồl kwang bàng lơh broă neh hòi jà, lam sồr tă priă, dong kờl bơh ală cau geh nùs nhơm niam lơh geh 100 nơm hìu nàng dong kờl ală hìu rơƀah geh rài kis gơtìp kal ke bè hìu ơm tàm càr Sơn La in. Lài mờ hơ̆, Củ tịc Quốk hội ồng Vương Đình Huệ bal mờ mpồl kwang bàng lơh broă neh tus chu ñàng, pơdơng bơkào tềng anih duh khoai Wa Hồ tàm ƀlàng dờng Tây Bắk, càr Sơn La.