Klo yal tiah đah jum mat tơngai lik lơgar Thổ Nhĩ Kỳ mờ tiah đah tô lơgar Syria pa gơlik geh dùl dơ̆ tơrluh ù lơh gơbàn jơnau gơ lời wơl kơn jơ̆ kơn jut ngan mờ git nđờ rbô nă cau chơt, git nđờ jơt rbô nă cau gơtìp sồt să, uă hìu đam mờ phan bơna gơtìp tơrlah tơrlơm, ala mat Quôk hội lơgar Việt Nam mờ să tờm is he dê, Củ tịc Quôk hội ồng Vương Đình Huệ neh pơyua sră tam pà bal moat jrùm mờ lùp còp jơh nùs ngan rlau jơh tus Củ tịc Quôk hội lơgar Thổ Nhĩ Kỳ mờ Củ tịc Quôk hội lơgar Syria mờ Quôk hội, làng bol 2 lơgar.

Củ tịc Quôk hội ồng Vương Đình Huệ ai tơnggŏ bơta pin dờn dà lơgar, làng bol Thổ Nhĩ Kỳ mờ dà lơgar, làng bol Syria gờñ sơrlèt gan tŭ tơngai kal ke, bơta lòng do, gàr kơ̆ kơljap rài kis lơh sa- mpồl bơtiàn. Củ tịc Quôk hội ồng Vương Đình Huệ đơs nền, là bơyô rềp mềr bơh Thổ Nhĩ Kỳ, Syria dê, Việt Nam sùm lòt bal mờ làng bol Thổ Nhĩ Kỳ tàm tŭ tơngai kal ke do, rơcang bal mờ mpồl bơtiàn dunia tus bal dong kờl Thổ Nhĩ Kỳ bơsong kơnau gơ lời wơl bơh dơ̆ tơrluh ù tàm bơta pràn geh ngan he dê.