Di tơngkah 95 nam Ngai crơng gơs Mpồl ala mat cau lơh broă Việt Nam (gam hòi là Kông đoàn), drim ngai 28/7, tàm Hìu niam chiài Việt Xô, ƀòn dờng Hà Nội, Mpồl ala mat cau lơh broă Việt Nam bơyai lơh dơ̆ jàu pà “Khà jờng Nguyễn Văn Linh” dơ̆ IV; jờng rơ Củ tịc Kông đoàn kâp hơ đơm, nghiệp đoàn kâp hơ đơm jak ngan geh pơn rơ gùt lơgar dơ̆ 5 mờ dờp Gai lòng Lơh broă khà Dùl bơh Củ tịc lơgar dê jàu pà ai Mpồl ala mat cau lơh broă Việt Nam in. Củ tịc Quôk hội ồng Trần Thanh Mẫn neh tus bal mờ đơs tàm dơ̆ bơyai lơh.

Ala mat kwang đơng lam bồ Đảng, Dà lơgar, Củ tịc Quôk hội ồng Trần Thanh Mẫn jờng rơ ală cồng nha geh pơn rơ bơh mpồl lơh broă Kông đoàn, mpồl đoàn viên, cau lơh broă gùt lơgar neh lơh geh tàm 95 nam do; nting bơr gờm chờ 10 nă kwang bàng Kông đoàn geh jàu pà Khà jờng Nguyễn Văn Linh mờ 95 nă Củ tịc Kông đoàn kâp hơ đơm, nghiệp đoàn kâp hơ đơm geh pơn rơ, jak ngan geh jờng rơ, pà khà jờng. Củ tịc Quôk hội ồng Trần Thanh Mẫn sồr, Kông đoàn ală kâp pơn jat tai lơh jat geh cồng nha Jơnau lơh nền tàm Pơrjum dờng cau ala mat gùt lơgar dơ̆ 13 bơh Đảng dê; Jơnau lơh nền tàm pơrjum sồ 2 bơh Ƀộ Cíñ trị dê bè tam gơl pa rơndap broă mờ broă lơh bơh Kông đoàn Việt Nam dê tàm bơta pa mờ ală jơnau lơh nền, gùng dà broă lơh bơh Đảng, bơta dong kờl adat boh lam bơh Dà lơgar dê bè rơndap broă, broă lơh bơh Kông đoàn dê.