Đơs tàm pơrjum, Củ tịc Quôk hội Vương Đình Huệ đơs là, Pơrjum Nghị sỹ kơnòm să gùt plai ù dơ̆ 9 là broă lơh lơh broă mờ lơgar ndai uă lơgar dờng ngan rlau jơh bơh Quôk hội lơgar Việt Nam dê drơng lơh tàm nam 2023.

Pơrjum neh geh bơyai lơh geh cồng nha uă ngan, bơdìh mờ bơta kơ̆p gơn, pơgồp bơnah yal tơngĭt dùl bă rề ơnàng làm uă mờ niam bơnĕ bè rùp hin, Dà lơgar, kòn bơnus lơgar Việt Nam dê, bè Quôk hội lơgar Việt Nam, bè bơta niam chài Việt Nam dê. Củ tịc Quôk hội kung đơs là, tàm Pơrjum Nghị sỹ kơnòm să gùt plai ù dơ̆ 9, Quôk hội lơgar Việt Nam neh sac rơwah di tơngume bè tam gơl sồ mờ tam gơl pa bơceh lơh. Tơngume do neh lơh geh bơta gơ kờñ ai ală kwang bàng tus bal in. Jat Củ tịc Quôk hội, bơh broă lơh cribơyai broă mờ lơgar ndai uă lơgar dơ̆ do, Quôk hội lơgar Việt Nam rcang bơyai lơh ală broă lơh ndai.