Còp Tổng Ƀí thư, Củ tịc lơgar Lào dê Bounnhang Vorachith mờ Thủ tướng lơgar Lào dê lài do Thongsing Thammavong, Củ tịc Quôk hội lơgar Việt Nam dê Vương Đình Huệ tơngŏ nùs nhơm chờ hờp geh tìp ală cau oh mi, cau bơyô đềt mềr ngan bơh Đảng, Dà lơgar mờ Làng bol lơgar Việt Nam dê.

Củ tịc Quôk hội gờm chờ ală oh mi lài do là kwang bàng đơng lam bồ kâp dờng lơgar Lào dê di dơ̆ sơntờm dà lơgar dơ̆ 48 mờ jờng rơ ngan cồng nha lơh geh tàm broă lơh broă tàm dơlam lơgar mờ lơh broă mờ lơgar ndai dờng ngan mờ Đảng, Dà lơgar mờ Làng bol lơgar Lào oh mi dê neh lơh geh tàm ală nam do, tàm hơ̆ geh ală tă pơgồp dờng màng ngan bơh ală oh mi lài do là kwang bàng đơng lam bồ kâp dờng lơgar Lào dê. Củ tịc Quôk hội lơgar Việt Nam dê Vương Đình Huệ tơlik nùs nhơm pin dờn, bơh bơta lam bồ àng sơrdah ngan bơh Đảng Làng bol Kăc màng Lào dê, dà lơgar Lào rơ̆p sơrlèt gan jơh ală kal ke, ngai sơlơ bơtàu tơnguh lơngăp lơngai is, rơcăng lài is, pas sơm bơtàu tơnguh sùm, làng bol lơgar Lào oh mi ngai sơlơ hờm ram mờ chờ hờp chờ hờñ.