Đơs tàm dơ̆ tìp mat, Củ tịc Quôk hội Vương Đình Huệ đơs nền, nam 2023, tàm ală cồng nha bal bơh Quôk hội dê, sùm geh bơta lòt bal, tă pơgồp kuơmàng ngan bơh ală anih yal tơnggit jơnau, anih lơh ƀău dê. Ală anih lơh ƀău sùm rơcang lài, jơh nùs yal wil tơl, di tŭ, tơl làm ală broă lơh bơh Quôk hội dê tus cau tĕ khà mờ làng bol gùt lơgar pơgồp bơnah tơnguh jơnau git wă mờ bơta ring bal bơh làng bol dê gơ wèt mờ ală broă lơh nền bơh Quôk hội dê; ai ală adat boh lam, kơrnuat boh lam, Nghị quyết bơh Quôk hội, Ủy ƀan Thường vụ Quôk hội dê gờñ lơh jat ngan ngồn tàm rài kis. Sră ƀău neh yal di tŭ ală bơta kơp kờñ bơh ală gah broă, ală mpồl cau, bơh cau tĕ khà, làng bol dê tus pơrjum Quôk hội mờ dùl gah pin dờn ngan nàng làng bol in jat sền Quôk hội, ală kwang bàng Quôk hội, geh bơta lơh bal 2 gah.

Củ tịc Quôk hội tơngkah, kwang đơng lam bồ mờ atbồ anih lơh ƀău pơn jat tai tơnguh bồ tơngoh cíñ trị; sền gròi tus bơto pơlam, tơnguh tơl làm bơta niam mpồl cau cih ƀău, cau cih jơnau đơs di mờ kơnòl broă geh jàu, wèt tus tơngkah kir sơnrai 100 nam Ngai sră ƀău kac màng Việt Nam (21/6/1925 – 21/6/2025).