Củ tịc Quôk hội Vương Đình Huệ đơs sùm, dơ̆ lòt còp geh gơtha kwơ màng tŭ 2 lơgar pa tơngkah kir sơnrai 10 nam bơta gĭt gơ̆p Lơh broă bal kwơ màng (2013-2023); pin dờn là cồng nha bơh dơ̆ lòt còp dê rơ̆p là tềl lời wơl kwơ màng nàng 2 lơgar in wèt tus bal tơnguh bơta gĭt gơ̆p Lơh broă bal kwơ màng tus gơnoar broă pa, wèt tus tơngkah kir sơnrai 70 nam 2 lơgar lơh bơta gĭt gơ̆p cribơyai broă mờ lơgar ndai nam 2025.

Tàm dơ̆ tìp mat, 2 nă kwang đơng lam bồ ring  bal pal pơn jat tai sơlơ tơnguh tàm pơgơl mpồl kwang bàng ală kấp, tơnguh uă cồng nha ală broă lơh lơh broă bal gam geh tŭ do, pơnđơl pràn lơh ngan ai priă lơh geh bơh kă bro đah 2 gah dê gờñ lơh geh 15 tơmàn dolar Mỹ, 2 gah lơh geh bơta ƀuơn ai ală gah phan tăc phan mờ lơgar ndai tờm ngan bơh 2 lơgar; tam pà bal bơta mờng chài lơh broă bơt bơtàu kơrnoat boh lam bơtàu tơnguh gah lơh sa mờ măi mok; dong kờl sơlơ tơnguh ală broă dong kờl nàng lơh mhar tŭ tơngai tam gơl năng lượng; gàr niam bơta rcang lơh is, lơngăp lơngai is tàm gah năng lượng lơh gơlik wơl. Củ tịc Quôk hội Vương Đình Huệ kơ̆p kờñ 2 lơgar pơn jat tai pơgồp bal niam rlau tai tàm tơngume Cíñ phủ kung bè Nghị viện nàng kờñ pơgồp bơnah bơt bơtàu bơta tam klăc bal, ring bal, gơnoar broă tờm bơh Asean dê, lơh jat niam gơnoar broă IPA kung bè gàr niam ring lơngai, kơ̆ kơl jap tàm tiah do dê.