Ala măt Quôk hội lơgar Việt Nam, Củ tịc Quôk hội Vương Đình Huệ chờ hờp bal mờ lơgar Campuchia bơyai lơh geh cồng nha dơ̆ tĕ khà Quôk hội khoă VII; chờ hờp bal mờ ồng Samdech Techo Hun Manet geh Quôk hội pin dờn pồ lơh Thủ tướng lơgar Bơtau Campuchia. Củ tịc Quôk hội Vương Đình Huệ pin dờn mờ đơs là, lơgar Campuchia rơ̆p lơh geh uă cồng nha dờng ơnàng rlau, pơgồp bơnah tơnguh uă gơnoar broă mờ bơngă pin dờn bơh lơgar Campuchia dê tàm tiah do mờ tàm dunia.

Tàm dơ̆ tìp măt tơm bơh bơr, 2 nă kwang đơng lam bồ jờng rơ bal cồng nha lơh broă bal lơh sa, kă bro đah 2 lơgar. Nam 2022, priă lơh geh bơh kă bro đah 2 gah dơ̆ sơnrờp lơh geh rlau 10 tơmàn dolar Mỹ. Tơngai tus, 2 gah kờñ pal tơrgùm lơh broă bal, dong kờl bal bơ̆t bơtàu rài lơh sa krơi is, rơcăng lài is, kơnờm is tàm bơta pràn he dê mŭt gơrờm bal mờ dunia jrô ơnàng làm uă; sơlơ tàm tơrbŏ bal 2 rài lơh sa, geh bal tàm tơrbŏ bal gùng lòt mờ tàm tơrbŏ bal ù tiah lơh sa, kwơmàng là 2 gah pal sơlơ tàm tơrbŏ bal gùng lòt, tàm hơ̆ geh tàm tơrbŏ bal ală gùng rơndeh lòt mhar, tơnguh tai khà dơ̆ ală rơndeh par lòt rê tơn đah 2 lơgar...