Tàm dơ̆ tìp măt, ală Đại sứ lơgar Việt Nam tàm bàr pe tiah neh yal bè broă lơh broă bơh anih lơh broă ala măt lơgar Việt Nam tàm lơgar he lơh broă, gĭt gơ̆p đah lơgar Việt Nam mờ ală lơgar, đơs sùm ală cồng nha pơnrơ ngan tàm ală dơ̆ lòt còp bơh Củ tịc Quôk hội Vương Đình Huệ dê tus ală dà lơgar tàm tơngai lài neh pơgồp bơnah chồl tơnguh gĭt gơ̆p đah lơgar Việt Nam mờ ală lơgar, lơh jăt ngan ngồn ală gah broă lơh broă bal ờs mờng bơh lài, lơh geh bơnàng jă, pờ tơlik ală gah broă lơh broă bal pa.

Đơs tàm dơ̆ tìp măt, Củ tịc Quôk hội Vương Đình Huệ tơlik nùs nhơm chờ hờp wă rò ală Đại sứ, Kwang ătbồ Anih lơh broă ala măt cribơyai broă mờ lơgar ndai lơgar Việt Nam dê tàm lơgar ndai, mờ đơs nền broă lơh lơh broă mờ lơgar ndai tàm tơngai lài neh lơh geh uă cồng nha kwơmàng, gơgơs là dùl bơta pơnrơ tàm jơh ală cồng nha lơh geh bal bơh dà lơgar dê tàm ală nam do. Kwơmàng tàm bơta dunia gơbàn kal ke, ờ gơtùi gĭt lài, mơya broă lơh lơh broă mờ lơgar ndai neh lơh geh uă cồng nha jơh bal bè 2 gah mờ uă gah, ngăc ngar chài ngan tàm broă tàm pơnring broă rơndăp lơh, gàr kơ̆ tiah ơm kis ring lơngai ai bơtàu tơnguh, mŭt gơrờm bal mờ dunia jrô ơnàng làm uă in.