Tơnơ̆ dơ̆ wă rò, Đại tướng Phan Văn Giang neh tìp mat cribơyai broă mờ Đại tướng Tea Banh. Tàm dơ̆ tìp mat cribơyai broă, Đại tướng Phan Văn Giang mờ Đại tướng Tea Banh neh ring bal đơs, nam 2022 pa do là nam geh gơtha kuơmàng ngan gơ wèt mờ bơta git gơp 2 lơgar, geh kwang đơng lam bồ kâp dờng 2 lơgar git nền là “Nam git gơp lơh bơyô Việt Nam- Campuchia, Campuchia- Việt Nam”.

Bè gùng dà lơh broă bal tàm tơngai tus, Đại tướng Phan Văn Giang mờ Đại tướng Tea Banh ring bal ală tơngume broă rơndap lơh lơh broă bal sền gàr dà lơgar nam 2023 jat nùs nhơm pin dờn, ngan ngồn, geh cồng nha, đơs nền tàm 2, 3 tơngume tờm: Sơlơ tơnguh lơh broă bal tàm pơ gơl jơnau tơnggit, broă gơlik geh, pơgồp bal lòt sền, gròi sền, sền gàr kơ̆ lơngăp lơngai, ring lơngai hơ đang ù gờl mờ tàm dà lềng; pơgồp bal lam lơh geh cồng nha broă lơh broă bal ală tơngume geh gơ rềng tàm nam Campuchia bơyai lơh SEA Game 22 mờ ASEAN Para Games 12; pơn jat tai sền gròi lơh broă bal tàm gah bơto bơtê cau lơh broă, pơgồp bal lòt jòi, rờ tơrgùm, cèng rê tơp ƀòn tờm ƀồc ntìng cau ling lơh broă dong kờl is mờ cau jak chài lơgar Việt Nam chơt phi să tàm lơgar Campuchia tàm ală rài tam lơh.