Tàm ală ngai do mò H Juaih Mlô, gam sơnđan là Mè Oanh, kis tàm ƀòn Pưk Prông, xã Ea Ning, kơnhoàl Cư̆ Kuiñ, càr Dăk Lăk sùm ờ ru bơh àng drim gờñ nàng rơcang trŭ sa ai mpồl lơh broă geh gơnoar in gam ơm sền gàr bơta lơngăp lơngai tềng tiah hờ lồi ƀòn. Bơnah phan sa tờm là gơnoar atbồ xã jun tus, bơnah phan tĕ geh làng bol pơgồp tai. Tus bal dong kờl trŭ sa geh gal ngan kơnòm dềt tàm ƀòn, den tàng ală pò phan sa tŭ lơi kung pal gam duh tŭ jun tus tềng anih sền gàr. Do là nùs nhơm bơh làng bol kis tàm ƀòn dê, dong kờl ală kwang bàng, cau ling lơh jăt kơnòl broă sền gàr bơta lơngăp lơngai ală ngai do. “Geh bơh gơnoar atbồ dong kờl jơh ală phan do, mờ geh làng bol kung dong kờl ờ uă bơta phan sa do nàng trŭ sa, nàng pơlam nùs nhơm jơh ală oh mi tàm mpồl ling kung là kwang àng tàm ƀòn, pơlam nùs nhơm nàng sền gàr bơta lơngăp lơngai ƀòn lơgar kung bè là xã tờm he dê nàng lơngăp lơngai”.

Ờ mìng hìu mò H Juaih, geh uă hìu ndai tàm xã Ea Ning kung dan mờ gơnoar atbồ ƀòn lơgar nàng trŭ geh ală sa dong kờl ală mpồl lơh broă gam lơh jăt kơnòl broă sền gàr bơta lơngăp lơngai tàm kơnhoàl Cư̆ Kuiñ. Lŏ Nguyễn Thị Nhị, Củ tịc mpồl cau ùr xã Ea Ning pà git, mpồl cau ùr neh lơh jăt nàng ală oh mi cau ùr tus bal dong kờl bè phan bơna bal mờ nùs nhơm nàng geh dơ̆ sào sa tơl phan bơkah, gàr niam bơta pràn kơl dang să jan mờ bơta pràn tam dră ai ală kwang bàng, cau ling gam lơh jăt kơnòl in. Ală ngai do, neh geh git nđờ rơhiang pò phan sa, phan sa ing geh làng bol rơcang lơh mờ jun tus UɃÑZ xã nàng jun tus ală anih sền gàr. “Oh mi tàm ală mpồl cau ùr tàm ƀòn tus bal uă ngan, geh cau tă ngai lơh broă, geh cau dong kờl phan nàng drơng tàm broă trŭ sa. Bơdìh mờ broă trŭ sa geh ờ uă oh mi cau ùr kung tus bal mờ mpồl ling tàm ờ uă ƀòn. Jơh ndrờm là tàm ală mpồl cau ùr ƀòn là geh phan lơi cèng tus hìu lơh broă Ủy ƀan, geh cau cèng phe, geh cau cèng biăp, kơnuh plai chi, geh cau cèng bal priă nàng dong kờl. Tàm ală ngai do den broă trŭ sa geh di pơgăp 500 dơ̆ sa. Bơdìh mờ ală tiah sền gàr tàm xã den gam tơnguh ai ală cau ling bơh kơnhoàl kung bè bơh càr tus tàm xã in tai”.

Tơnơ̆ mờ dơ̆ broă gơlik geh tàm xã, làng bol ndrờm yă broă lơh iơh bơsăk, tìs mờ adăt boh lam uă ngan bơh ală cau ờ niam dê, làng bol kung sồr bal là tơnguh nùs nhơm rơcang lài, dùl nùs tam klăc bal mờ gơnoar atbồ bal mờ ală mpồl lơh broă geh gơnoar nàng sền gàr kơl jăp bơta lơngăp lơngai ƀòn lơgar, mờ nùs nhơm kơ̆p kờñ rài kis gờñ bè ờs wơl. Tàm tơl ƀòn, ờ geh cau lơi sồr cau lơi, cau lơi kung ndrờm rơcang ngăc lài, pơgồp bal mờ mpồl lơh broă geh gơnoar lơh jăt kơnòl broă, di tŭ yal tŭ gŏ ală cau krơi tus tàm ƀòn. Ồng Nguyễn Thừa Đức, kis tàm thôn 22, xã Ea Ning, kơnhoàl Cư̆ Kuiñ đơs: “Bơdìh mờ broă yal mblàng, lam sồr làng bol den mìng is să tờm añ kung tă pơgồp bal dùl bơnah dềt nàng bal mờ mpồl kwang àng, kling klàng bal mờ tàm mpồl lơh broă cíñ trị nàng pơgồp bal bơta pràn jòi kŭp cau tìs, lơh gơs kơnòl sền gàr bơta lơngăp lơngai tàm ƀòn lơgar geh niam”.

Bŭ lah mìng là ală phan sa ing ha là ală khàr dà, kơl dung ƀañ, mơya tơl nă làng bol ndrờm geh pơyoa bal tàm hơ̆ ală nùs nhơm đềt mềr ngan, pơn dờm pơn điang kwang bàng, cau ling gam lơh jăt kơnòl broă. Lŏ H Nalin Mlô, kis tàm ƀòn Pưh Prong, xã Ea Ning, kơnhoàl Cư̆ Kuiñ tơlik nùs nhơm: “Làng bol kis tàm ƀòn tŭ do tam klăc bal uă ngan, pin dờn ngan mờ adăt boh lam bơh dà lơgar dê, drơng tàm broă lơh sa hìu nhă. Mờ tàm bơta di lah gŏ ală cau ờ niam geh pin pơrdah là yal mơ mờ anih lơh broă geh gơnoar nàng pơgồp bal lơh broă, sền gàr bơta lơngăp lơngai dà lơgar tàm ƀòn”.

Gơtùi đơs bơh broă lơh ngan jòi kŭp, tam dră mờ uă broă lơh di tŭ mờ geh cồng nha, mìng tàm dùl tơngai ờ jŏ, bơta lơngăp lơngai neh geh bè ờs wơl tàm ală thôn, ƀòn tàm xã Ea Tiêu mờ xã Ea Ktur dê. Kung bơh nùs nhơm pin dờn hơ̆ neh dong kờl làng bol tus bal mờ mpồl lơh broă geh gơnoar nàng kŭp geh cau tìs, gơs là anih dong kờl kơl jăp tŭ ai geh ală pò piang sào tus mờ mpồl ling sền gàr anih kơrian ha là tus bal tus bal tă pơgồp, dong kờl hìu nhă kwang bàng, cau ling, làng bol gơtìp aniai bơh dơ̆ broă do dê.