Drim ngai 14/06, Hội đồng Ñân zân càr Dăk Lăk bơyai lơh Dơ̆ pơrjum Tơngume is dơ̆ 09, khoă X, tơngai lơh broă bơh nam 2021- 2026 nàng ring bal uă kơrnoăt kwơmàng gơrềng tus bơtàu tơnguh lơh sa- mpồl bơtiàn bơh càr dê.

Tàm dơ̆ pơrjum do sơl, Hội đồng Ñân zân càr Dăk Lăk kung neh pồ bơtơl gơnoar broă Phó Củ tịc Ủy ƀan Ñân zân càr, khoă X, tơngai lơh broă bơh nam 2021- 2026. Tàm dơ̆ pơrjum, ală kwang bàng neh sền swì, tă pơgồp jơnau đơs mờ ring bal ală sră sền, sră yal lùp sền wơl mờ jơnau rơcăng cih kơrnoăt bè sền swì ring bal tam gơl tơn jơ̆ dơ̆ tă mờ dơ̆ ngui kes priă càr nam 2021; giă phan bơna, drơng broă kwơ dà lơgar bơtơ̆t rbòng dà nam 2022 gơwèt mờ broă bơ̆t bơtàu bơtơt rbòng dà ngui priă Dà lơgar dê tàm ù tiah càr; lơh nền tơngume, khà tă priă ngui broă lơh ai tơmŭt tàm anih sơm jơh ngir ma túy pal lơh, broă lơh sơm jơh ngir ma túy lơh is tàm hìu bơnhă, ƀòn lơgar, anih sơm jơh ngir ma túy mờ ătbồ tơnơ̆ tŭ sơm jơh ngir ma túy  tàm ù tiah càr dê; broă dong kờl gơwèt mờ cau chài tàm ù tiah càr Dăk Lăk dê, tơngai bơh nam 2023- 2025.

Tàm dơ̆ pơrjum kung neh bơyai lơh pồ bơtơl gơnoar broă Phó Củ tịc Ủy ƀan Ñân zân càr gơwèt mờ ồng Nguyễn Thiên Văn, Kwang bàng Tỉñ ủy, Ƀí thư Huyện ủy, Củ tịc Hội đồng Ñân zân kơnhoàl Ea Súp. Mờ khà sră pồ geh 98,5%, ồng Nguyễn Thiên Văn geh pồ ăt gơnoar broă Phó Củ tịc Ủy ƀan Ñân zân càr Dăk Lăk, khoă X, tơngai lơh broă bơh nam 2021- 2026.