Broă lơh geh lơh pa rlau 150 kơi sồ gùng che trung áp, 345 kơi sồ gùng che hạ áp, 196 trạm biến áp mờ lơh niam wơl gĭt nđờ jơ̆t trạm biến áp bal mờ uă phan bơna drơng broă ndai. Mờ kông ty kung tơrgùm lơh sir ală jơnau yal tơngĭt, ală măi mok lơh is tàm pà ồs đèng....

Mờ bơta rcang lài jơh nùs, tàm 7 nhai do, ồs đèng Dăk Lăk neh lơh sir 20 bơta broă lơh, ai priă rlau 1 bơnah 3 broă rơndăp lơh priă nam dê. Ală rơndăp broă lơh pờ ơnàng, lơh niam gùng che ồs đèng mờ uă trạm biến áp neh geh lam lơh, dong tơnguh bơta pràn pờ ồs đèng lơngăp lơngai bè ờs, lơh geh ală bơta ai broă bơtàu tơnguh lơh sa mpồl bơtiàn. Tŭ do gah ồs đèng gam jơh nùs pơgồp bal mờ ală tiah bơsong ală bơta kòl yan tàm broă ai ù nàng lơh mhar tŭ tơngai mut lơh ală broă lơh, rơndăp broă lơh neh geh ai priă.