Drim òr (28/06), rơlao 20 rơbô nă cau pơrlòng tàm càr Dăk Lăk neh mŭt tàm dơ̆ pơrlòng sơnrờp ngan bơh dơ̆ pơrlòng jơh bơsram kấp pe nam 2023. Jăt jơnau yal bơh Sở Giáo zụk mờ Đào tạo càr Dăk Lăk dê, tàm dơ̆ pơrlòng môn Ngữ văn, gùt càr geh 62 nă cau pơrlòng ờ tus pơrlòng tàm khà 20 rơbô 829 nă cau dan cih măt pơrlòng.

Geh 9 tàm 33 anih pơrlòng geh khà cau pơrlòng tus 100%. Ală anih pơrlòng geh bơyai lơh lơngăp lơngai, nền nòn, ờ geh cau pơrlòng kung bè kwang bàng sền pơrlòng tìs mờ kơrnoăt pơrlòng. Tàm dơ̆ pơrlòng drim òr broă sền gàr bơta lơngăp lơngai geh lơh nền nòn, mpồl ling tàm ală anih pơrlòng geh tơnguh uă rơlao pơn drờm mờ ală nam. Kwơ màng là tàm kơnhoàl Cư̆ Kuiñ, do là tiah pa gơtìp sò tơm iơh bơsăk lơh 9 nă kwang bàng bal mờ làng bol gơtìp chơ̆t, mpồl kwang àng geh ai tus jơh tàm dơlam mờ bơdìh anih pơrlòng nàng sền gàr bơta lơngăp lơngai ai dơ̆ pơrlòng in.