Sơrlèt rlau 120 nam tơnggơs mờ bơtàu tơngguh, Dăk Lăk tŭ do geh bă ù geh is, khà kờp làng bol gơ wèt mpồl ală càr, ƀòn dờng lam bồ gùt lơgar; lơh sa bơtàu tơngguh mhar ngan, gàr sùm bơta pràn gơguh uă kờp bal geh 8% dồ nam tàm sùm 20 nam rê hờ ndo. Is ồn, Dăk Lăk gam là tiah bơtòm tơrgùm uă bơhiàn niam chài krơi is bè bơta kwơ niam chài ờs mờng bơh yau, adăt bơhiàn mờng kwèng bơh mpồl bơtiàn 49 jơi bơtiàn dê ơm kis bal. Tus mờ đơs chờ hờp bal mờ Đảng ƀộ, gơnoar ătbồ mờ làng bol ală jơi bơtiàn càr Dăk Lăk, Phó Thủ tướng Duh broă sùm Cíñ phủ ồng Nguyễn Hoà Bình sồr càr Dăk Lăk pal hòi tơrgùm bơta pràn tơrgùm bal, jòi lơh geh cồng nha bơta pràn, bơta ƀươn bơtàu tơngguh, chồl tơngguh pràn kơldang gơn kơnờm gơguh lơh sa; tam gơl pa broă lơh tơrlòng lài lơh sa, broă tờm là bơtàu tơngguh ală phan bơna lơh geh bơh broă lơh sa sươn sre, brê bơnơm geh bơta ƀươn, geh lơh uă, niam ngan, tăc uă mờ lơgar ndai; chồl tơngguh broă lơh broă lơh sa sươn sre lơh gơlik phan bơh broă lơh sa sươn sre, brê bơnơm, phan tàm dà mờ lơh gơlik năng lượng lơh geh wơl; bơ̆t bơtàu ală anih lơh broă cíñ trị sàng goh, pràn kơnhăp, sàng goh song dơ pă, lơh broă, tài làng bol drơng broă; bơtàu tơngguh lơh sa- mpồl bơtiàn, sền gàr tiah ơm kis, gàr niam lơngăp lơngai rài kis mpồl bơtiàn; sền gàr niam dà lơgar, lơngăp lơngai mờ rơndăp tăp sèng niam jơh gùt mpồl bơtiàn.

Tàm dơ̆ bơyai lơh, ala măt kwang đơng lam bồ Ƀộ Niam chài, Tàp pràn să jan mờ Lòt nhơl neh yal Jơnau lơh nền mờ jàu Sră dờng Phan kwơ dà lơgar “Jòi tơrgùm sề khuàng lŭ Ñrùh Hai” ai càr Dăk Lăk in. Bal mờ hơ̆, Anih kơlôi sơnơng jak ngan Dà lơgar dê kung jàu 3 bơta jak ngan dà lơgar dê ai càr Dăk Lăk in, geh: Dăk Lăk là càr geh bă ù mờ khà kơphê lơh geh uă ngan rlau jơh lơgar Việt Nam; Tơnau Lăk, kơnhoàl Lăk, càr Dăk Lăk là tơnau dà sa geh is geh bă ù ơnàng ngan rlau jơh tiah Tây Nguyên, lơgar Việt Nam dê; Brê dà lơgar Yok Đôn, càr Dăk Lăk geh bă ù brê chi rơha dờng ngan rlau jơh Việt Nam.