Dăk Lăk bơyai lơh dơ̆ tơngkah kir sơnrai 120 nam tơnggơs mờ bơtàu tơnguh

Thứ bảy, 04:00, 23/11/2024

Cau mblàng K’Hạnh/VOV Tây Nguyên

VOV4.K’Ho- Mang ngai 22/11, Đảng ƀộ, gơnoar atbồ mờ làng bol ală jơi bơtiàn càr Dăk Lăk neh yŭ rơ yùm bơyai lơh dơ̆ tơngkah kir sơnrai 120 nam Ngai tơnggơs càr. Phó Thủ tướng Duh broă sùm Cíñ phủ ồng Nguyễn Hoà Bình tus bal mờ đơs tàm dơ̆ bơyai lơh.

Ngày 22/11/1904, Gơnoar atbồ làm gùt tiah Đông Dương ai lơh jat Jơnau lơh nền bơh Cíñ phủ dê cah Dăk Lăk gơ gơs dùl tàm 20 càr, ƀòn dờng gơwèt Tiah tàm gùl lơgar rài cau sò tơm lơgar Tây thàm phà.

Càr Dăk Lăk sơnrờp geh sơnđan mat là Darlac, tơnggơs ngai 22/11/1904 (Rùp: bơh Kwang ătbồ cơldŭ lơh broă ala măt lơgar Tây tàm Dăk Lăk Leopold Sabatier cùp nam 1930)

Dăk Lăk tŭ do geh bă ù geh is, khà kờp làng bol gơwèt mpồl ală càr, ƀòn dờng lam lài gùt lơgar, mơkung là tiah tờm tàm tơrbŏ gùng lòt rê kwơ màng bơh Tây Nguyên dê; geh ală bơta ƀuơn ngan nàng lơh broă bal, tàm tơrbŏ bal ù tiah bơtàu tơnguh, lơh geh bơta gơn kơnờm sơlơ tơnguh tai lơh broă bal bơtàu tơnguh lơh sa, niam chài, mpồl bơtiàn mờ ală tiah tàm tiah Tây Nguyên, tiah jat kềng gah dà lềng tiah tàm gùl lơgar mờ ală tiah tờm lơh sa dờng bơh jơh gùt lơgar dê.

Lòt gan 120 nam tơnggơs mờ bơtàu tơnguh, càr Dăk Lăk neh gơ gơs dùl càr bơtàu tơnguh bơh tiah tàm gùl lơgar mờ Tây Nguyên dê, khà kờp làng bol uă mờr 2 tơlak nă làng bol mờ 49 jơi bơtiàn ơm kis bal.

Tus bal mờ đơs tàm dơ̆ bơyai lơh, Phó Thủ tướng Duh broă sùm ồng Nguyễn Hoà Bình đơs nền gơnoar broă kwơ màng bơh càr Dăk Lăk dê gơwèt mờ tiah do mờ dà lơgar geh sền gĭt tàm uă gùng dà broă lơh bơh Dà lơgar dê.

Gùng lòt rê bơh càr Dăk Lăk dê bơtàu tơnguh lam lài tàm tiah do mờ gam pơn jat tai geh sền gròi bơcri priă lơh

Càr Dăk Lăk pal tơrgùm tam gơl pa broă lơh lơh sa di tiah, di anih, bơh bàr pe bơta tờm, bè: bơtàu tơnguh ală phan bơna lơh geh bơh broă lơh sa suơn sre, phan brê geh bơta ƀuơn, broă lơh dờng, bơta niam uă, tăc phan mờ lơgar ndai uă; sơlơ tơnguh tai lơh broă broă lơh sa suơn sre, lơh gơlik phan lơh geh bơh broă lơh sa suơn sre, phan brê, phan tàm dà mờ lơh gơlik năng lượng lơh gơlik wơl.

“Ƀòn dờng Kơphê dunia”geh Dăk Lăk sền gĭt là tiah tơrgùm ală bơta bè ù tiah brê bơnơm, bơta kwơ kah yau, bơhiàn niam chài bơh lơgar dờng pràn kơphê Việt Nam dê

Sền gròi prap gàr, ngui niam bơhiàn niam chài bơh yau niam bơnĕ bơh làng bol ală jơi bơtiàn dê pơgồp bal bơtàu tơnguh lòt nhơl niam chài; Lơh pràn lơh bal kơnhoàl ù tiah, tìp mat lơh kwèng, lơh broă bal đah ală tiah; sền gàr niam dà lơgar- lơngăp lơngai mờ lơh broă mờ lơgar ndai.