Tơnơ̆ 4 nam lơh kông ñân lơh phan rơndeh ôtô tàm càr Bình Dương, bi Nguyễn Văn Việt, kis tàm xã Ea Na, kơnhoàl Krông Ana neh ơm lơh broă nàng jòi geh broă lơh ndai. Kơno cau yal geh dơ̆ yal broă lơh geh bơyai lơh tàm kơnhoàl, bi Việt neh tus nàng jòi sền. Tơnơ̆ mờ tŭ neh geh iăt jơnau pơlam mờ sền jơnau yal rơwah cau lơh broă tàm ală lơgar Hàn Quốk, Đài Loan, Nhờk, bi Việt neh jào sră dan lòt lơh broă tàm lơgar Nhờk. Bi Việt pin dờn là, mờ broă mờng chài 4 nam lơh broă bơh bi dê geh gơdờp mờ tiah lơh broă tàm lơgar Nhờk mờ do kung là dơ̆ niam nàng bi tơnguh bơtàu să tờm mờ tơngu uă priă geh. “Lài mờ tŭ tus tàm dơ̆ yal broă lơh tàm kơnhoàl Krông Ana, añ kung neh jòi sền bè broă lòt lơh broă hờ lơgar ndai sơl. Do kung là nùs nhơm kơ̆p kờñ nàng tơnguh bơtàu să tờm mờ geh priă ai hìu nhă in. geh ală oh mi tàm Anih yal broă lơh pơlam, añ kung neh jòi sền nền nòn rơlao bè broă rơwah kông ty nàng añ lơh broă. Añ lơh jăt gah broă dăp phan lơh ơtô tàm lơgar Nhờk”.

Pa rê tơnơ̆ mờ 2 nam lòt ling, bi Lê Anh Nam kis tàm thôn 2, xã Quảng Điền kung mhar jòi geh tus tàm dơ̆ pơlam broă lơh nàng jòi sền broă lơh să tờm in sơl. Tơnơ̆ mờ tŭ geh pơlam bè ală broă bơto broă lơh mờ broă lơh ai ơruh pơnu neh jơh tơngai lòt ling rê tàm ƀòn lơgar in, bi Nam neh lòt bơsram măi rơndeh ôtô nàng jòi geh broă lơh di pal mờ să tờm: “Tŭ do, añ pa rê ling, den tàng geh broă ai jơnau yal bè broă cau ling pa rê ling in den añ tus bal, tàm do geh ală jơnau yal di pal, mùl màl mờ añ kung kờñ jòi gah broă ai să tờm in tàm rài kis rơlao. Tềng đăp măt añ lòt bơsram nàng geh sră măi rơndeh mờ kông nghệ ôtô tơnơ̆ mờ hơ̆ lòt lơh broă”.

Jăt ồng Y Thắng B’dăp, Phó Củ tịc Mpồl cau lơh broă sa kơnhoàl Krông Ana đơs, tŭ do gùt kơnhoàl geh di pơgăp 58% khà kờp làng bol tàm sơnam lơh broă. Nàng dong kờl cau lơh broă in git jơnau tơngit di pal mùl màl bè rơwah broă lơh, Mpồl cau lơh broă sa suơn sre neh pơgồp bal mờ Anih yal broă lơh càr bơyai lơh ală dơ̆ pơlam broă lơh tàm kơnhoàl mờ ală xã geh uă cau tàm sơnam lơh broă, mơya ờ hềt jòi geh broă lơh di pal. Broă ai ală dơ̆ yal broă lơh tus tàm kơnhoàl geh dong kờl cau lơh broă in geh uă bơta rơwah jòi broă lơh di pal, pơgồp bal tàm broă lơh tơmù khà cau ờ geh broă lơh, dong kờl cau lơh broă geh broă lơh mờ geh priă ring niam tơnơ̆ satềp. “Mpồl cau lơh broă sa kơnhoàl pơn jăt tai lơh anih tơrbŏ ai Anih yal broă lơh in, ai ală mpồl lơh sa kă bro in nàng lơh bè lơi ai geh tơl, hòi jà, yal mblàng, lam sồr cau tàm sơnam lơh broă kờñ geh broă lơh nàng tus jòi sền ală broă lơh, dong kờl, pơlam broă lơh nàng ală cau do in git broă dong kờl bơh Dà lơgar gơwèt mờ broă dong kờl ai ală cau lơh broă in kờñ lơh broă tàm càr, bơdìh càr ha là lòt lơh broă jăt gah broă tờm mùl màl. Bơdìh hơ̆ tai, Mpồl cau lơh broă sa kơnhoàl gam pơgồp bal mờ Ngân hàng Cíñ sác nàng dong kờl tai priă nàng càn lòt lơh broă hờ lơgar bơdìh”.

Ồng Nguyễn Văn Cường, Phó Kwang atbồ Anih tờm yal broă lơh càr Dăk Lăk pà git, tàm nam 2023, Anih yal broă lơh, lơh ngan yal broă lơh ai di pơgăp 10 rơbô nă cau in, khà cau lòt lơh broă rơlao 3 rơbô nă mờ cau lòt lơh broă hờ lơgar bơdìh di pơgăp 1 rơbô 500 nă. Nàng lơh geh bơta do, tàm nam 2023, Anih yal broă lơh geh bơyai lơh di pơgăp 60 dơ̆ pơlam broă lơh tàm ală tiah mờ di pơgăp 10 dơ̆ broă lơh jăt tơngu me tàm Anih yal broă lơh. Bơdìh hơ̆ tai geh pơgồp bal mờ Sở Giáo dục bơyai lơh ală dơ̆ pơlam broă lơh ai kơnòm bơsram ơdŭ 12 in. Ală dơ̆ yal broă lơh kung geh tam gơl jăt gùng dà tus rềp mờ cau lơh broă rơlao: “Bồ nam 2023 jơnau kờñ bơh ală mpồl lơh sa kă bro dan bơh Anih yal broă lơh geh uă ngan, nàng di pal bơsong, dong kờl ală mpồl lơh sa kă bro rơwah cau lơh broă den Anih yal broă lơh geh lơh pràn jơh ală broă lơh bè jơnau yal broă lơh, tàm hơ̆ uă ngan là tam gơl broă lơh là Anih yal broă lơh bơyai lơh tus tơn tàm ală thôn, ƀòn, geh tŭ là bơyai lơh tàm trồ mang, ngai dơ̆ poh, ngai rơlô jăt mờ jơnau kờñ bơh tiah hơ̆ dê mờ kwơ màng ngan tàm nam 2023 do, Anih yal broă lơh geh lơh pràn broă tus bal tàm ală dơ̆ Lơh chờ bơh ală tiah dê nàng lam sồr ai làng bol in git loh kung bè lơh geh uă bơta ală tơngu me tàm ală dơ̆ lơh chờ, pleh mờ pơrlồm tŭ jòi broă lơh”.

Kung jăt ồng Nguyễn Văn Cường đơs, càr Dăk Lăk tŭ do geh di pơgăp 600 Mpồl lơh sa kă bro tàm càr gam kờñ rơwah cau lơh broă, uă mpồl lơh sa kă bro bơdìh càr kung gam lùp tus Anih yal broă lơh càr nàng dan rơwah cau lơh broă bơh càr Dăk Lăk lòt lơh broă tàm ală càr. Mpồl rơwah ờ uă ngan là 200 nă mờ uă ngan là 5 rơbô nă. Do là dơ̆ niam nàng cau lơh broă càr Dăk Lăk jòi geh broă lơh ai să tờm in.