Tàm Anih tờm Lơh sră pơ àr dà lơgar càr Dăk Lăk dê, tàm ngai lơh broă bơh sơnrờp tơnơ̆ dơ̆ ơm rlô sa tềp bơhiàn dà lơgar dê, mpồl cau tus bơsong broă ờ hềt uă. Bulah bè hơ̆, jơh ală kwang bàng, kông cưk, viên cưk neh lòt lơh broă wơl bal mờ nùs nhơm chờ hờp chờ hờñ, jơh nùs drơng niam ngan rlau jơh jơnau kờñ bơh làng bol dê. Tàm Tiah lơh sa mờ măy mok Tân An, Kông ty Kổ phần Ban Mê Green Farm bơyai lơh dơ̆ lam lòt lơh gơlik phan sầu riêng, mrĕ nàng tăc dơ̆ phan bơh sơnrờp bơh sơnam pa dê tus drà kă bro lơgar Lo mờ Nhờk. Tàm sươn sre, tàm ală ngai do, cau lơh broă sa càr Dăk Lăk kung neh tus lơh broă wơl sền gàr chi tam, phan ròng tơnơ̆ ală ngai ơm rlô sa tềp. Do là tềl tơngŏ chờ hờp, pơgồp bơnah lơh geh cồng nha ală jơnau kờñ, kơnòl broă bơtàu tơnguh lơh sa- mpồl bơtiàn bơh nam 2023 do dê.