Do là dùl tàm ală tơngume geh Mpồl đơng lam dơ̆ pơrlòng jơh bơsram kâp 3 nam 2023 càr Dăk Lăk đơs nền tàm dơ̆ pơrjum ƀău yal bè dơ̆ pơrlòng jơh bơsram kâp 3 mờr geh lơh. Dơ̆ pơrlòng nam do, gùt càr Dăk Lăk geh rlau 21 rbô nă cau cih mat tus bal pơrlòng, tàm hơ̆ cau pơrlòng là cau jơi bơtiàn dùl êt nă cau geh 28%. Bè khà anih pơrlòng, geh 33 anih pơrlòng ngan ngồn mờ kờp jơh 900 cơldŭ pơrlòng. Tus tŭ do, ală hìu bơsram neh gàr niam tơl bơta bè phan bơna, măi mok tàm ală anih pơrlòng, anih photo jơnau lùp pơrlòng mờ anih ai điểm pơrlòng jat jơnau sồr.

Hơ jơnau lùp bè bơta kơlôi rơcang bơh cau pơrlòng, mè bèp dê tơnơ̆ dơ̆ lơh roh bơtă lơngăp lơngai tàm anih lơh broă Ủy ƀan Ñân zân 2 xã tàm kơnhoàl Cư Kuiñ, Mpồl đơng lam dơ̆ pơrlòng pà git gam lơh niam broă lơh mblàng yal, pơn jờng nùs nhơm nàng kơnòm bơsram in iang nùs tus bal dơ̆ pơrlòng. Mờ kung đơs nền neh rơcang nền nòn, gàr lơngăp lơngai uă ngan rlau jơh tàm ală ngai bơyai lơh pơrlòng.