Nam 2022, kờp jơh tă dia tàm kes priă dà lơgar càr Dăk Lăk dê geh rơlao 8 rơbô 900 tơmàn đong, geh rơlao 141% khà rơndăp broă Dà lơgar jào, 119% khà rơndăp broă Hội đồng Ñân zân càr jào, gơguh rơlao 30% pơn drờm mờ tŭ do nam 2021.

Tàm hơ̆, tă dia, priă mờ khà priă geh gah Dia atbồ tă geh rơlao 5 rơbô 800 tơmàn đong, geh rơlao 127% pơn drờm mờ rơndăp broă Dà lơgar jào mờ gơguh rơlao 15% pơn drờm mờ rơndăp broă Hội đồng ñân zân càr jào. Nàng lơh geh cồng nha geh pơnrơ do, bơdìh mờ ală broă lơh ngan bơh gah Dia dê, gam geh broă lơh broă bal pơgồp bal dờng màng bơh ală mpồl lơh broă, cau dùl nă să tă dia. 235 mpồl lơh broă, cau dùl nă să tă dia geh pơnrơ geh Ƀộ Tài cíñ, UɃÑZ càr, Tổng Kụk Dia mờ Kụk Dia càr Dăk Lăk jờng rơ, pơn jờng tàm Pơrjum là broă geh dờp ai ală broă pơgồp bal bơh ală mpồl lơh broă, cau dùl nă să dê tàm broă tă dia.