Ià căp ñơ̆t ơn tàm wàng ròng kơnrồ, bi Y Hen Niê, ơm tàm ƀòn Yông B, xã Ea Drơng, kơnhoàl Cư Mgar chờ hờp pà gĭt, do là “phan tờm lơh sa” dong hìu bơnhă bi lik klàs rƀah tàm lồi nam lài. Bơh 7 nam lài, hìu bơnhă bi geh kơnhoàl dong kờl 40 tơlak đong nàng lơh hìu tam klăc dờng. Dùl nam tơnơ̆ hơ̆, Ủy ƀan Mặt trận dà lơgar xã pơn jat tai dong kờl priă jền blơi dùl nơm kơnrồ me sơntìl. Bè hơ̆ sùm 6 nam do, hìu bơnhă bi ròng siam ai kơnrồ in deh rơ̆ rài gơ gơs mpồl 5 nơm kơnrồ, tăc ƀà kòn bè, ngui è kơn rồ ơn tàm suơn kơphê in. Ùr bơklau bi kung tàm tơngkah bal tryang tryồng lơh sa, ròng siam bơto bơtê oh kòn nàng kơ̆ kơljap rài kis. Bi Y Hen Niê đơs:“Lài do kal ke, rƀah ngan, geh bơta sền gròi bơh Dà lơgar, pà sơntìl phan ròng bè sur, kơnrồ, dong kờl lơh hìu ơm. Mờ bơta sền gròi hơ̆ den hìu bơnhă ùr bơklau, oh kòn bi dê ngai sơlơ tryang tryồng lơh sa, pơnđơl pràn brồ guh. Ùr bơklau añ kung lơh ngan lơh geh uă priă jền, lơh tai đah bơdìh nàng bơtàu tơnguh lơh sa mờ rài kis niam rlau tai. Añ dan ưn ngài ngan ală kấp neh sền gròi”.

Kung “lik klàs rƀah” bơh lồi nam lài, hìu bơnhă bi H Blip Niê ơm tàm ƀòn Yông neh bơcri priă blơi tai 7 sào ù mìr tam kơphê nàng lơh geh tai priă jền. Bi H Blip đơs, geh bơta tam gơl hơ̆ kơnờm geh Mặt trận dà lơgar xã dong kờl 3 nơm kòn be sơntìl bơh lồi nam 2017. Bi H Blip đơs: “Hìu bơnhă añ lài do kal ke ngan, ờ geh ù lơh sa den rƀah ngan. Geh dà lơgar dong kờl kòn be sơntìl den añ kung lơh ngan ròng siam ai kòn be in deh rơ̆ rài nàng hời rơ hời tơrmù ƀà kal ke, ai priă tềm pềr den leng càn tai nàng blơi ù mìr, tam kơphê mờ hời rơ hời rề ơnàng lơh sa nàng brồ guh lik klàs rƀah”.

Broă lơh tềm pềr ròng sur ù kung geh lơh gơ rề uă tàm gùt kơnhoàl Cư Mgar mờ bơta lơh jat bal bơh Kwang bàng, đảng viên mờ làng bol. Geh rề ơnàng làm uă  tàm ală mpồl. Mò H Núi Niê, Phó Củ tịc Mpồl tam klăc cau ùr kơnhoàl Cư Mgar pà gĭt, mpồl cau ùr kung lam lơh broă lơh ròng sur ù mờ khà priă tềm pềr bơh 1 rơbô đong tus 20 rơbô đong pah nhai, geh oh mi jơh nùs lơh jat ngan. Mò H Núi Niê đơs:“Tàm ală nam do den lam lơh tơl Ci hội geh ết ngan rlau jơh bơh 1 broă lơh tềm pềr, tàm hơ̆ geh broă lơh “Ròng sur ù” là geh lơh jat uă ngan rlau jơh. Bơh broă lơh do den kung rề ơnàng geh uă ngan broă lơh, tàm hơ̆ geh pơgap 60% oh mi là làng bol kòn cau dùl ết nă cau lơh jat broă lơh, lơh broă do”.

Bal mờ bơta sền gròi lơh jat bơh jơh bal ală anih lơh broă cíñ trị dê, broă lơh tềm pềr ròng sur ù neh gơ gơs srơh geh gơ rề uă gùt tàm kơnhoàl Cư Mgar, lơh geh priă jền gơguh tus gĭt nđờ tơmàn đong nàng lam lơh broă lơh dong kờl ală hìu bơnhă rƀah, hìu bơnhă ndrờm bè rƀah mờ hìu bơnhă geh rài kis kal ke in. Kơnờm bè hơ̆, tus tŭ do, khà hìu bơnhă rƀah tàm gùt kơnhoàl neh gơmù uă ngan, gam geh pơgap 4,4%, hìu bơnhă ndrờm bè rƀah gam pơgap 7,5%, priă lơh geh kờp bal tơl nă cau lơh geh rlau 59 tơlak đong dùl nă cau dùl nam. Rài kis làng bol dê ngai sơlơ geh tam gơl.

Ồng Y Wem Hwing, Phó Củ tịc Ủy ƀan Ñân zân kơnhoàl Cư Mgar pà gĭt:“Broă sền gròi rài kis phan bơna mờ nùs nhơm ai mpồl bơtiàn ală jơi bơtiàn kòn cau tàm ù tiah kơnhoàl Cư Mgar dê den kơnhoàl sùm sền gròi mờ ai bơta hơ̆ là dùl tàm ală kơnòl broă lài ngan nàng sền gròi rài kis phan bơna, nùs nhơm làng bol in, ngan là ală hìu bơnhă rƀah, hìu bơnhă cíñ sác mờ ală hìu bơnhă kal ke, jat nùs nhơm đơng lam là ờ gŏ lời cau lơi gơtìp lời wơl bơh ngkời. Lơh niam broă lơh mblàng yal gùng dà broă lơh bơh Đảng, broă lơh adat boh lam bơh dà lơgar dê ai làng bol in. Tề lam, pơlam gùng dà nùs nhơm, gùng dà broă lơh, ngan là gơwèt mờ ală cau neh lòt tìs gùng tìs dà sơbơng roh nàng khi in gĭt wă di mờ lơh broă di nàng pơgồp bơnah lơh làng bol niam tàm mpồl bơtiàn”.

Broă lơh ƀuơn ngan, tơl hìu bơnhă mìng tềm pềr bơh 1 rơbô đong pah nhai mơya ală cồng nha gơ cèng wơl là priă jền uă ngan nàng dong kờl ală broă lơh sền gàr niam rài kis mpồl bơtiàn geh ngan. Broă lơh ròng sur ù tàm kơnhoàl Cư Mgar neh pơgồp bơnah bè ờs wơl rài kis ai uă hìu bơnhă tàm kơnhoàl in, ngan là làng bol kòn cau dùl ết nă cau gơwèt hìu bơnhă rƀah, hìu bơnhă ndrờm bè rƀah mờ geh rài kis kal ke ngan. Kơnờm hơ̆, khi sơlơ pin dờn tai tàm gùng dà broă lơh bơh Đảng dê, sền gròi lơh sa, brồ guh lik klàs rƀah, pơgồp bơnah bơtàu tơnguh lơh sa tàm kơnhoàl dê.